រដ្ឋាភិបាលនៃប្រទេសម៉ាឡេស៊ី កម្ពុជា និងថៃ បានចេញសេចក្តីថ្លែងការណ៍រួមមួយ បន្ទាប់ពីកិច្ចប្រជុំពិសេសមួយដែលរៀបចំដោយប្រទេសម៉ាឡេស៊ី ដើម្បីដោះស្រាយជម្លោះព្រំដែនដែលកំពុងបន្តរវាងកម្ពុជា និងថៃ។ កិច្ចប្រជុំនេះ ដឹកនាំដោយនាយករដ្ឋមន្ត្រីម៉ាឡេស៊ី លោក Dato’ Seri Anwar Ibrahim មានការអញ្ជើញចូលរួមពីនាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត និងនាយករដ្ឋមន្ត្រីស្តីទីប្រទេសថៃ លោក Phumtham Wechayachai ។ សហរដ្ឋអាមេរិក និងចិនក៏បានចូលរួមយ៉ាងសកម្មក្នុងការគាំទ្រកិច្ចខិតខំប្រឹងប្រែងសន្តិភាពក្នុងតំបន់ផងដែរ។

នៅក្នុងសេចក្តីថ្លែងការណ៍រួម មេដឹកនាំបានសង្កត់ធ្ងន់លើការប្តេជ្ញាចិត្តរបស់រដ្ឋាភិបាលទាំងពីរក្នុងការកាត់បន្ថយការជម្លោះ ដើម្បីសន្តិភាព និងស្ថិរភាពក្នុងតំបន់។ សម្តេចនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីស្តីទី Phumtham Wechayachai បានបង្ហាញពីឆន្ទៈក្នុងការអនុវត្តវិធានការនានាដែលលើកកម្ពស់សន្តិភាព និងស្ថិរភាពនៅតាមព្រំដែន។