ភ្នំពេញ៖ នៅថ្ងៃទី០៨ ខែឧសភា ឆ្នាំ២០២៥ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានអញ្ជើញជាអធិបតីក្នុងកិច្ចប្រជុំលើកទី១០ របស់ អ.ដ.ក.។ ការជួបជុំនេះមានការចូលរួមពីថ្នាក់ដឹកនាំ និងសមាជិកអាជ្ញាធរ រួមនឹងមន្ត្រីមកពីអគ្គលេខាធិការដ្ឋាន អ.ដ.ក.។

កិច្ចប្រជុំបានផ្តោតលើការពិនិត្យលើវឌ្ឍនភាពនៃកិច្ចខិតខំប្រឹងប្រែងដោះស្រាយវិវាទក្នុងរយៈពេលកន្លងមក និងពិភាក្សាអំពីគំនិតផ្តួចផ្តើមនាពេលខាងមុខដើម្បីបង្កើតការិយាល័យតំណាងរបស់ អ.ដ.ក. នៅក្នុងសហគមន៍ជនជាតិដើមភាគតិច និងតំបន់ដាច់ស្រយាល។ គំនិតផ្តួចផ្តើមនេះមានគោលបំណងធ្វើឱ្យដំណោះស្រាយវិវាទកាន់តែងាយស្រួលដល់ប្រជាពលរដ្ឋដែលរស់នៅក្នុងជនជាតិភាគតិច និងតំបន់ដាច់ស្រយាល។

ក្នុងកិច្ចប្រជុំនោះ អ.ដ.ក. បានវាយតម្លៃខ្ពស់លើការងារដែលកំពុងដំណើរការរបស់ខ្លួន ហើយបានឈានដល់កិច្ចព្រមព្រៀងជាគោលការណ៍ដើម្បីបង្កើតគម្រោងការដោះស្រាយវិវាទនៅក្នុងសហគមន៍ដែលខ្វះខាត។ គម្រោងនេះ គ្រោងបង្កើតការិយាល័យ អ.ដ.ក. នៅក្នុងខេត្តចំនួន ៤ នៅភាគឦសាននៃប្រទេសកម្ពុជា ដែលត្រូវបានគេរំពឹងថានឹងត្រូវបានប្រកាស និងអនុវត្តក្នុងពេលឆាប់ៗនេះ ដើម្បីបង្កើនលទ្ធភាពទទួលបានយុត្តិធម៌នៃការដោះស្រាយវិវាទក្រៅប្រព័ន្ធតុលាការ។

ចាប់ពីខែមិថុនា ឆ្នាំ ២០២៤ ដល់ថ្ងៃទី ៥ ខែឧសភា ឆ្នាំ២០២៥ អ.ដ.ក. បានទទួលពាក្យបណ្តឹងសរុបចំនួន ៨៥៨ករណី និងបានដោះស្រាយដោយជោគជ័យចំនួន ៣៣៤ ករណី។ ភាគច្រើននៃពា្យបណ្តឹងដែលបានប្តឹងមកគឺទាក់ទងនឹងវិវាទដីធ្លី វិវាទកិច្ចសន្យាខ្ចីប្រាក់ វិវាទអចលនទ្រព្យ វិវាទគ្រួសារ វិវាទមរតក វិវាទពាណិជ្ជកម្ម វិវាទការងារ និងវិវាទផ្សេងៗទៀត។

ជាមធ្យម អ.ដ.ក. ទទួលពាក្យសុំអន្តរាគមន៍ប្រហែល ៩០ករណី ក្នុងមួយខែ ហើយបានដោះស្រាយបញ្ចប់វិវាទប្រមាណ ២០ ករណីក្នុងមួយខែ។ វិវាទដីធ្លី និងវិវាទកិច្ចសន្យាខ្ចីប្រាក់ជាវិវាទដែលមានភាគរយខ្ពស់ជាងគេដែលត្រូវបានទទួល និងដោះស្រាយដោយ អ.ដ.ក. ។

ការពង្រីកការិយាល័យរបស់ អ.ដ.ក. ជាផ្នែកមួយនៃការអនុវត្តគម្រោងចុះដោះស្រាយវិវាទជូនប្រជាពលរដ្ឋនៅតំបន់ជនជាតិដើមភាគតិច និងតំបន់ដាច់ស្រយាល ក្នុងគោលបំណងបង្កើតជាបណ្តាញការងាររបស់ អ.ដ.ក. ដោយបង្ខិតសេវាដោះស្រាយវិវាទឱ្យកាន់តែទៅកៀកនឹងប្រជាពលរដ្ឋនៅមូលដ្ឋាន និងធានាបាននូវភាពសុខដុមរមនា និងយុត្តិធម៌ក្នុងសង្គមជាតិ៕