ភ្នំពេញ៖​ នៅថ្ងៃទី៧ ខែឧសភា លោក កើត រិទ្ធ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ បានទទួលជួបលោក Vanlalvawna Bawitlung ឯកអគ្គរដ្ឋទូតថ្មីនៃសាធារណៈរដ្ឋឥណ្ឌាប្រចាំនៅកម្ពុជា ចូលជួបសម្តែងការគួរសមនៅក្រសួងយុត្តិធម៌។

ក្នុងជំនួបនោះ លោកឧបនាយករដ្ឋមន្ត្រី កើត រិទ្ធ បានសម្តែងការអបអរសាទរ និងស្វាគមន៍យ៉ាងកក់ក្តៅចំពោះការតែងតាំងឯកឧត្តម Bawitlung ជាឯកអគ្គរដ្ឋទូតឥណ្ឌា។ ថ្នាក់ដឹកនាំទាំងពីរបានពិភាក្សាគ្នាអំពីទំនាក់ទំនងទ្វេភាគីដ៏យូរអង្វែងរវាងកម្ពុជា និងឥណ្ឌា ដោយសង្កត់ធ្ងន់ជាពិសេសលើការពង្រឹងបន្ថែមទៀតនូវកិច្ចសហប្រតិបត្តិការក្នុងវិស័យច្បាប់ និងតុលាការ។

មេដឹកនាំទាំងពីរបានឯកភាពគ្នាលើសារៈសំខាន់ក្នុងការបន្តពង្រឹង និងពង្រីកកិច្ចសហប្រតិបត្តិការផ្នែកច្បាប់រវាងប្រទេសកម្ពុជា និងប្រទេសឥណ្ឌា ជាពិសេសលើការបញ្ចប់ការរៀបចំនូវសន្ធិសញ្ញាស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ និងសេចក្តីព្រាងសន្ធិសញ្ញាស្តីពីបត្យាប័ន ដើម្បីធ្វើឱ្យកិច្ចសហប្រតិបត្តិការផ្នែកច្បាប់រវាងប្រទេសទាំងពីរកាន់តែមានលក្ខណៈគ្រប់ជ្រុងជ្រោយ៕