ហ្សាការតា ប្រទេសឥណ្ឌូនេស៊ី៖ នៅថ្ងៃទី៥ ឧសភានេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា បានចូលជួបសម្តែងការគួរសម និងពិភាក្សាការងារជាមួយលោក Prabowo Subianto ប្រធានាធិបតីនៃសាធារណរដ្ឋឥណ្ឌូនេស៊ី នៅវិមានប្រធានាធិបតី ទីក្រុងហ្សាកាតា ក្នុងដំណើរបំពេញទស្សនកិច្ចការងារនៅប្រទេសឥណ្ឌូនេស៊ី។
លោកប្រធានាធិបតី Prabowo Subianto បានស្វាគមន៍សម្តេចតេជោ ហ៊ុន សែន ដោយបានលើកឡើងថាជាកិត្តិយដែលបានទទួលវត្តមានរបស់សម្តេចតេជោនៅឥណ្ឌូណេស៊ី បន្ទាប់ជំនួបរវាងរបស់លោកប្រធានាធិបតី និងសម្តេចតេជោ នៅរាជធានីភ្នំពេញ កាលពីក្នុងខែកញ្ញា ឆ្នាំ២០២៤។ លោកបានទទួលស្គាល់បទពិសោធន៍ដ៏យូរអង្វែងរបស់សម្តេចតេជោ ហ៊ុន សែន និងថានៅក្នុងតំបន់អាស៊ីអាគ្នេយ៍សម្តេចតេជោជាបុរសរដ្ឋ ដែលមានបទពិសោធន៍ដឹកនាំប្រទេសយូរឆ្នាំ។ លោកក៏បានលើកឡើងពីបាថកថាពិសេសដែលរបស់លោក ហ៊ុន សែន នៅវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា ដោយលើកឡើងពីការប្តេជ្ញាចិត្តរបស់ឥណ្ឌូនេស៊ីក្នុងការលើកកម្ពស់កិច្ចសន្ទនា ការផ្សះផ្សាជាតិ និងការដោះស្រាយជម្លោះដោយសន្តិវិធីនៅកម្ពុជា ចាប់តាំងពីទសវត្សរ៍ឆ្នាំ ១៩៨០ និង ១៩៩០។ លោកប្រធានាធិបតី Prabowo បានបញ្ជាក់ថា ការប្តេជ្ញាចិត្តនេះ គឺជាមូលដ្ឋានគ្រឹះសម្រាប់ទំនាក់ទំនងទ្វេភាគីកម្ពុជា-ឥណ្ឌូណេស៊ីរឹងមាំ និងកិច្ចសហប្រតិបត្តិការសេដ្ឋកិច្ចក្នុងអាស៊ាន។
ក្នុងជំនួបនោះ សម្តេចតេជោ ហ៊ុន សែន បានថ្លែងអំណរគុណចំពោះការស្វាគមន៍យ៉ាងកក់ក្ដៅ និងបានទទួលស្គាល់ចំណងមិត្តភាពជាមួយលោកប្រធានាធិបតី Prabowo ដែលមានរយៈពេលជាង ៣០ ឆ្នាំមកហើយ។ សម្តេចតេជោ ហ៊ុន សែន បានគូសបញ្ជាក់ថា ទំនាក់ទំនងកម្ពុជា-ឥណ្ឌូណេស៊ី មានទំនាក់ទំនងមិត្តភាពជាង ៣៧ឆ្នាំ ចាប់តាំងពីកិច្ចចរចាសន្តិភាពបានចាប់ផ្តើម ហើយបានទទួលស្គាល់ជំនួយរបស់ឥណ្ឌូនេស៊ីថាជាផ្នែកមួយសម្រាប់សមិទ្ធិផលបច្ចុប្បន្នរបស់កម្ពុជា។ សម្តេចតេជោ ហ៊ុន សែន បញ្ជាក់ពីតម្រូវការបន្តពង្រឹងកិច្ចសហប្រតិបត្តិការទាំងទ្វេភាគី និងក្នុងតំបន់អាស៊ាន។
សម្តេចតេជោ ហ៊ុន សែន អបអរសាទរលោកប្រធានាធិបតី Prabowo ដែលទទួលបានជ័យជម្នះក្នុងការបោះឆ្នោតនាពេលថ្មីៗនេះ។ សម្តេចតេជោ បានកត់សម្គាល់ឃើញពីភាពរឹងមាំរបស់ឥណ្ឌូណេស៊ី បានក្លាយជាអធិរាជផ្នែកស្បៀង ហើយក៏ជាអធិរាជផ្នែកសន្តិសុខឋាមពលផងដែរ ខណៈកម្ពុជាទោះបីមានសន្តិសុខស្បៀងក៏នៅខ្វះសន្តិសុខថាមពលដែរ។ លោកសង្ឃឹមថា ប្រទេសទាំងពីរអាចជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ទេសចរណ៍ និងអាកាសចរណ៍បន្ថែមទៀត។
សម្តេចតេជោ ហ៊ុន សែន ក៏បានជម្រាបទៅលើប្រធានាធិបតីឥណ្ឌូណេស៊ី ពីការអញ្ជើញរបស់ព្រះមហាក្សត្រកម្ពុជាចំពោះលោកក្នុងការបំពេញទស្សនកិច្ចនៅកម្ពុជានៅពេលសមស្រប។ សម្តេចតេជោ បញ្ជាក់ថា កន្លងទៅមានប្រធានាធិបតីឥណ្ឌូណេស៊ីជាច្រើនបានទៅទស្សនកិច្ចនៅកម្ពុជា ពេលកន្លងមក។
លោកប្រធានាធិបតី Prabowo បានអរព្រះគុណដល់ព្រះមហាក្សត្រសម្រាប់ការអញ្ជើញ និងទទួលយកដោយបញ្ជាក់ថា លោកនឹងមកបំពេញទស្សនកិច្ចនៅកម្ពុជានាពេលខាងមុខ។ លោកប្រធានាធិបតី ក៏បានផ្តាំតាមសម្តេចតេជោ ឲ្យនាំនូវសេចក្តីនឹករលឹកពីលោកថ្វាយព្រះករុណា ព្រះបាទ សម្តេច នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាផងដែរ។ លោកបានបន្ថែមថាក្នុងរយៈពេលប្រាំមួយខែរបស់គាត់ក្នុងនាមជាប្រធានាធិបតី ប្រទេសឥណ្ឌូនេស៊ីបានបោះជំហានយ៉ាងសំខាន់ក្នុងសន្តិសុខស្បៀង ដោយផ្តោតលើការជំរុញការវិនិយោគលើសន្តិសុខថាមពល។
លោកប្រធានាធិបតី Prabowo បានបង្ហាញពីចំណាប់អារម្មណ៍របស់ប្រទេសឥណ្ឌូនេស៊ីក្នុងការចុះហត្ថលេខាលើអនុស្សរណៈយោគយល់គ្នាលើផ្នែកនេសាទ ជាមួយប្រទេសកម្ពុជា និងបានបង្ហាញពីការត្រៀមខ្លួនសម្រាប់កិច្ចសហប្រតិបត្តិការរវាងក្រុមហ៊ុនឯកជនក្នុងវិស័យនេសាទ និងថាមពល។ ទាក់ទិននឹងវិស័យអាកាសចរណ៍ លោកបានកត់សម្គាល់ថា AirAsia Cambodia បានដំណើរការជើងហោះហើរទៅកោះបាលី ប្រទេសឥណ្ឌូណេស៊ីរួចហើយ ហើយក្រុមហ៊ុនឥណ្ឌូនេស៊ីកំពុងស្វែងរកជើងហោះហើរទៅកាន់ខេត្តសៀមរាប។
ទាំងសម្តេចតេជោ ហ៊ុន សែន និងលោកប្រធានាធិបតី Prabowo បានសម្តែងការពេញចិត្តចំពោះកិច្ចសហប្រតិបត្តិការយោធា និងយោធាដ៏រឹងមាំរវាងប្រទេសទាំងពីរ ហើយមេដឹកនាំទាំងពីរបានប្តេជ្ញាចិត្តក្នុងការពង្រីកបន្ថែមទៀត។ ពួកគេក៏បានពិភាក្សាអំពីកិច្ចសហប្រតិបត្តិការក្នុងការដោះស្រាយឧក្រិដ្ឋកម្មឆ្លងដែន ការក្លែងបន្លំតាមអ៊ីនធឺណិត និងការជួញដូរគ្រឿងញៀន៕
