អាហ្វហ្គានីស្ថាន៖ អ្នកនាំពាក្យក្រុមតាលីបង់ លោក Suhail Shaheen បានប្រាប់ឱ្យដឹងនៅថ្ងៃទី០៥ ខែកញ្ញានេះថា នៅក្នុងជំនួបផ្លូវការមួយរវាងមន្រ្តីជាន់ខ្ពស់របស់ក្រុមតាលីបង់ ជាមួយអគ្គលេខាធិការរងនៃអង្គការសហប្រជាជាតិទទួលបន្ទុកកិច្ចការមនុស្សធម៌ បានបញ្ចប់នៅថ្ងៃអាទិត្យម្សិលមិញនេះ ដោយបានលើកឡើង និងសន្យាថាអង្គការសហប្រជាជាតិ នឹងនៅតែបន្តរក្សាជំនួយមនុស្សធម៌សម្រាប់ប្រជាជននៃប្រទេសអាហ្វហ្គានីស្ថានដដែល។

ក្នុងជំនួបផ្លូវការនេះបានធ្វើឡើងរវាងលោក Mullah Abdul Ghani Baradar មន្រ្តីជាន់ខ្ពស់នៃឧុទ្ទកាល័យកិច្ចការនយោបាយ រួមនឹងបុគ្គលសំខាន់ផ្សេងៗទៀត ជាមួយលោក Martin Griffiths តំណាងភាគីអង្គការសហប្រជាជាតិ ខណៈអាហ្វហ្គានីស្ថានប្រឈមមុខនឹងវិបត្តិមនុស្សធម៌ដ៏មហន្តរាយដែលបង្កឡើងដោយគ្រោះរាំងស្ងួតធ្ងន់ធ្ងរនិងសេដ្ឋកិច្ចដែលហៀបនឹងដួលរលំ។

នៅលើ Twitter របស់អ្នកនាំពាក្យក្រុមតាលីបង់បានបង្ហោះសារមួយដូច្នេះថា៖ "គណៈប្រតិភូអង្គការសហប្រជាជាតិបានសន្យាថានឹងបន្តផ្តល់ជំនួយមនុស្សធម៌ដល់ប្រជាជនអាហ្វហ្គានីស្ថានដោយនិយាយថាលោកនឹងអំពាវនាវរកជំនួយបន្ថែមដល់អាហ្វហ្គានីស្ថានក្នុងអំឡុងពេលកិច្ចប្រជុំនៃប្រទេសម្ចាស់ជំនួយនាពេលខាងមុខ។"

គួរបញ្ជាក់ថា អាហ្វហ្គានីស្ថានដែលជាប្រទេសក្រីក្រមួយក្នុងចំណោមបណ្តា​ប្រទេសក្រីក្រផ្សេងទៀតនៅលើពិភពលោក បានធ្លាក់ចូលទៅក្នុងវិបត្តិធ្ងន់ធ្ងរភ្លាមៗដោយការបញ្ចប់ជំនួយបរទេសរាប់ពាន់លានដុល្លារ បន្ទាប់ពីការដួលរលំនៃរដ្ឋាភិបាលដែលគាំទ្រដោយបណ្តាប្រទេសលោកខាងលិច ក្រោយពីការផ្តួលរំលំរដ្ឋាភិបាល និងជ័យជំនះរបស់ក្រុមសកម្មប្រយុទ្ធអ៊ីស្លាមតាលីបង់កាលពីខែមុន៕