ភ្នំពេញ៖ យុវជន ពេជ្រ ពិសិដ្ឋ ដែលតាំងខ្លួនជាតារាចម្រៀងអធិរាជសម្លេងមាស ស៊ីន ស៊ីសាមុត ត្រូវបាននាយកដ្ឋានប្រឆាំងបទល្មើសបច្ចេកវិទ្យា កោះហៅឲ្យចូលខ្លួនទៅបំភ្លឺពាក់ព័ន្ធនឹងករណីប្រើប្រាស់ប្រព័ន្ធផ្សព្វផ្សាយសង្គម នៅក្រសួងមហាផ្ទៃ។ កាលបរិច្ឆេទត្រូវបាននាយកដ្ឋានប្រឆាំងបទល្មើសបច្ចេកវិទ្យាកំណត់យកនៅថ្ងៃទី៦ ខែកុម្ភៈ ឆ្នាំ២០២៥ វេលាម៉ោង៩៖០០នាទីព្រឹក តាមលិខិតកោះហៅដោយលោកឧត្តមសេនីយ៍ទោ សុខ នីតា ប្រធាននាយកដ្ឋានប្រឆាំងបទល្មើសបច្ចេកវិទ្យា ចុះថ្ងៃទី២៨ ខែមករា ឆ្នាំ២០២៥។

លិខិតកោះហៅបានណែនាំឲ្យលោក ពិសិដ្ឋ ផ្តល់ឯកសារមួយចំនួន រួមមានអត្តសញ្ញាណប័ណ្ណ សៀវភៅគ្រួសារ ឬសៀវភៅស្នាក់នៅ និងសម្ភារៈពាក់ព័ន្ធផ្សេងទៀត។

ករណី​នេះ​ទទួល​បាន​ការ​ចាប់​អារម្មណ៍​ជាខ្លាំងពេញបណ្តាញសង្គម ដោយ​មាន​បុគ្គល​ជា​ច្រើន​អះអាង​ខ្លួនថា​ជាអ្នកចាប់​កំណើត​ជាតារា​ចម្រៀង​ដ៏ល្បី​របស់កម្ពុជា លោក ស៊ីន ស៊ីសាមុត។ ក្នុង​នោះ​មាន​ឈ្មោះ ជិន គង់ អាយុ​៤២​ឆ្នាំ ជា​កសិករ មានកូនពីរនាក់ មាន​ទីលំនៅ​ភូមិ​ពាម ឃុំ​កំពង់​រាប ស្រុក​ព្រៃកប្បាស ខេត្តតាកែវ។ លោកបានប្រកាសជាសាធារណៈថា ខ្លួនជាអធិរាជសំឡេងមាស ថែមទាំងបង្ហាញបដានៅមុខគេហដ្ឋានរបស់លោក ដោយសរសេរថា «ផ្ទះលោក ស៊ិន ស៊ីសាមុត ចាប់ជាតិ»។ 

^{ជិន គង់ អាយុ​៤២​ឆ្នាំ ជា​កសិករ មានកូនពីរនាក់}

លើសពីនេះ អ្នកតាំងខ្លួនម្នាក់ទៀតឈ្មោះដើម ពេជ្រ ពិសិដ្ឋ ហៅ ពេជ្រ សាមុតពិសិដ្ឋ អាយុ ២៨ ឆ្នាំ ជានិស្សិតបញ្ចប់ការសិក្សាផ្នែកជំនាញនីតិសាស្ត្រពីសាកលវិទ្យាល័យភ្នំពេញ ក៏បានចេញមុខអះអាងដែរថា ខ្លួនជាអធិរាជចម្រៀងលោក ស៊ីន ស៊ីសាមុត ដែរ។ មានឪពុក ជានគរបាល អន្តោប្រវេសន៍ នៅក្រសួងមហាផ្ទៃ, ម្ដាយជា អាជីវករ, ពិសិដ្ឋ ជាកូនច្បងក្នុងចំណោមបងប្អូនបីនាក់ ហើយធ្វើការជាបុគ្គលិកផ្នែកច្បាប់ និងជាអ្នកចម្រៀង ដោយផ្តោតលើការបង្កើតតន្ត្រីនៅក្នុងស្ទូឌីយ៉ូ និងសម្តែងចំរៀងនៅក្នុងព្រះវិហារគ្រិស្តសាសនា។

^{ពេជ្រ ពិសិដ្ឋ ហៅ ពេជ្រ សាមុតពិសិដ្ឋ អាយុ ២៨ ឆ្នាំ ជានិស្សិតបញ្ចប់ការសិក្សាផ្នែកជំនាញនីតិសាស្ត្រ}

បុគ្គលទី៣ គឺព្រះតេជគុណ ព្រែកកន្ធីគង់ គង់នៅវត្តឧណ្ណាលោម ក៏បានអះអាងប្រាប់សារព័ត៌មានថា ព្រះអង្គតែងតែយល់សប្តិឃើញមរណភាពរបស់លោក ហើយអះអាងថា លោក ស៊ីន ស៊ីសាមុត មិនបានស្លាប់ដោយសាររបួសដោយកាំបិតដូចការជឿទូទៅនោះទេ ប៉ុន្តែត្រូវបានបាញ់ជំនួសវិញ។ គាត់កត់សម្គាល់ថាស្លាកស្នាមពីការបាញ់ប្រហារនៅតែមាននៅលើរាងកាយរបស់គាត់នៅក្នុងការចាប់កំណើតបច្ចុប្បន្ននេះ។

^{ព្រះតេជគុណ ព្រែកកន្ធីគង់}

មតិសាធារណៈ​ជុំវិញ​ការ​លើក​ឡើង​ទាំង​នេះ​បាន​ចោទ​ជា​សំណួរ​អំពី​អត្តសញ្ញាណ និង​សារៈសំខាន់​នៃ​វប្បធម៌​ដែល​បាន​សន្មត​ថា​ តើអ្នកណានឹងត្រូវទទួលស្គាល់ថាជាអ្នកចាប់កំណើតឡើងវិញជាអធិរាជ សម្លេងមាស លោក ស៊ីន ស៊ីសាមុត ពិតប្រាកដ៕