ថ្ងៃព្រហស្បតិ៍ ទី១២ ខែធ្នូ ឆ្នាំ២០២៤ មន្រ្តីសម្រុះសម្រួលដោះស្រាយវិវាទនៃ អ.ដ.ក. រួមមាន លោក ឡាយ អូន, លោកស្រី ជូ វិនាថ និងលោក ហ៊ូ ប៊ុនណន បានសម្រុះសម្រួលផ្សះផ្សាបញ្ចប់វិវាទពាក់ព័ន្ធនឹងកិច្ចសន្យាខ្ចីប្រាក់រ៉ាំរ៉ៃ ដែលអូសបន្លាយរយៈពេល ១២ ឆ្នាំ របស់ប្រជាពលរដ្ឋរស់នៅស្រុកខ្សាច់កណ្ដាល ខេត្តកណ្តាល។

វិវាទដ៏រ៉ាំរ៉ៃនេះ កើតឡើងតាំងពីអំឡុងឆ្នាំ២០១២ ផ្តើមចេញពីការខកខានមិនបានអនុវត្តតាមកាតព្វកិច្ចនៃកិច្ចសន្យាខ្ចីប្រាក់ ហើយត្រូវបានភាគីម្ខាងទៀតដែលជាម្ចាស់បំណុល បានស្វែងរកដំណោះស្រាយតាមផ្លូវតុលាការ រហូតដល់តុលាការកំពូល និងឈានដល់នីតិវិធីអនុវត្តដោយបង្ខំទៅលើអចលនវត្ថុរបស់កូនបំណុលតាមដីកាសម្រេចរបស់តុលាការកំពូល។ ក្រោយមក នៅអំឡុងខែសីហា ឆ្នាំ២០២៤  ករណីវិវាទនេះ ត្រូវបានភាគីម្ខាងដាក់ពាក្យមក អ.ដ.ក. ដើម្បីស្នើសុំសម្រុះសម្រួលផ្សះផ្សាបញ្ចប់វិវាទ។

អ.ដ.ក. បានពិនិត្យ សិក្សា ស្រាវជ្រាវដោយយកចិត្តទុកដាក់ និងបានដោះស្រាយបញ្ចប់វិវាទនេះ ដោយផ្អែកលើឆន្ទៈព្រមព្រៀងរបស់គូភាគី។ 

គូភាគីវិវាទបានសះជាជាមួយគ្នា ហើយបានផ្តិតមេដៃលើកំណត់ហេតុព្រមព្រៀងបញ្ចប់វិវាទ ដែលផ្អែកតាមច្បាប់ កំណត់ហេតុនេះមានអានុភាពអនុវត្តដូចសាលក្រមស្ថាពររបស់តុលាការដែរ។