សៀមរាប: លោក ព្រំ វិច ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខប្រមាញ់ និងនេសាទខេត្តសៀមរាបបានឱ្យដឹងថា បន្ទាប់ពីទទួលបានវ៉ាក់សាំងបង្កាជំងឺគោ ក្របី ពីអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី០៣ ខែកញ្ញា ឆ្នាំ២០២១នេះ មន្ត្រីការិយាល័យផលិតកម្ម និងបសុព្យាបាលសហការជាមួយអាជ្ញាធរមូលដ្ឋានបានចុះអប់រំ និងចាក់ថ្នាំបង្ការជំងឺដុំពកស្បែកគោនិងក្របី ជូនដល់ប្រជាពលរដ្ឋនៅឃុំដានរុន ស្រុកសូទ្រនិគម ខេត្តសៀមរាប។

លោកបានបន្តថា យុទ្ធនាការចាក់ថ្នាំការពារជំងឺគោ ក្របី ដើមរដូវវស្សា សម្រាប់ខេត្តសៀមរាបបានចាប់ផ្តើមពីថ្ងៃទី០១ ខែកញ្ញា ឆ្នាំ២០២១មកដោយបានចាក់នៅតាមបណ្តាស្រុកនានាជាបន្តបន្ទាប់។ ជាក់ស្តែងថ្ងៃទី០២ និងទី០៣ ខែកញ្ញានេះមន្ត្រីបច្ចេកទេសបសុពេទ្យបានចុះអនុវត្តន៍ការចាក់ថ្នាំបង្កាជំងឺគោ ក្របីនៅភូមិគោកសង្កែ ភូមិជ្រៃ ឃុំខ្ចាស់ និងភូមិសន្ទៃយ៍ ឃុំដានរុន ស្រុកសូទ្រនិគម បានចំនួន ៥៨៨ក្បាល និងបានចែក ខិតប័ណ្ណអប់រំបានចំនួន ១,០០០ សន្លឹក។ ជាមួយគ្នានេះមន្រ្តីជំនាញ នឹងបន្តចាក់នៅតាម ភូមិ ឃុំតាមបណ្តាស្រុកផ្សេងៗក្នុងខេត្ត តាមផែនការ។

លោក ព្រំ វិច បានបញ្ជាក់ថា នៅខែសីហា និងកញ្ញានេះមានគោ ក្របី នៅភូមិស្រម៉ធំ តំបន់ព្រៃរនាមឃុំដានរុន ស្រុកសូទ្រនិគម ចំនួន០៩ក្បាលបានងាប់ (ភាគច្រើនសត្វតូច) សង្ស័យជំងឺសារទឹក។ លោកប្រធានការិយាល័យផលិតកម្ម និងបសុព្យាបាលខេត្តបានបន្តថា កម្មវិធីចាក់វ៉ាក់សាំងដល់គោក្របី គឺជាផ្នែកមួយ នៃកម្មវិធីរបស់អគ្គនាយកដ្ឋានសុខភាពសត្វ និងផលិតកម្មសត្វ ដែលជាគោលនយោបាយរបស់ក្រសួងកសិកម្ម រុក្ខា ប្រមាញ់ និងនេសាទ តម្រូវឱ្យប្រជាពលរដ្ឋមិនថានៅខេត្តសៀមរាបនោះទេ គឺនៅទូទាំងប្រទេសយកគោក្របីមកទទួលការរក្សាសុខភាពតាមរយៈការចាក់ថ្នាំការពារសុខភាព៕

^{ប្រភព ៖ AKP}