ភ្នំពេញ: ការត្រៀមរៀបផ្សព្វផ្សាយវេទិកានិពន្ធនាយកសារព័ត៌មាន អាស៊ី-អឺរ៉ុបលើកទី១០ ត្រូវបានលើកយកមកពិភាក្សាក្នុងកិច្ចប្រជុំមួយដោយមន្ត្រីជាន់ខ្ពស់ក្រសួងព័ត៌មាន លោក មាស សុភ័ណ្ឌ នៅព្រឹកថ្ងៃទី០២ ខែកញ្ញា ឆ្នាំ២០២១។ កិច្ចប្រជុំនេះបានលើកឡើងនូវកិច្ចការសម្រាប់រៀបចំវេទិកានិពន្ធនាយកសារព័ត៌មានលើកទី១០ ដែលគ្រោងធ្វើនៅក្នុងខែវិច្ឆិកា ខាងមុខនេះ និងបានពិនិត្យទៅលើវឌ្ឍនៈភាពសម្រាប់រៀបចំវេទិកាតុមូល ដោយត្រូវធ្វើសេចក្តីព្រាងខ្លឹមសារ ការត្រៀមទីកន្លែង ការសម្របសម្រួល ការចូលរួមរបស់អ្នកសារព័ត៌មានក្នុងស្រុក។

ព្រឹត្តិការណ៍ផ្សព្វផ្សាយពិធីបើក និងបិទកិច្ចប្រជុំកំពូលអាស៊ី-អឺរ៉ុប ASEM លើកទី១៣ នឹងទទួលការផ្សាយដោយអគ្គនាយកដ្ឋានទូរទស្សន៍ជាតិកម្ពុជា វិទ្យុជាតិកម្ពុជា និងទីភ្នាក់ងារសារព័ត៌មានកម្ពុជា AKP ដែលបានត្រៀមរួចជាស្រេចសម្រាប់ការផលិត សិក្សាស្រាវជ្រាវអត្ថបទ ខ្លឹមសារ រូបភាពទាក់ទងកិច្ចប្រជុំកំពូលអាស៊ី-អឺរ៉ុប លើកទី១៣ រយៈពេល២ថ្ងៃនោះផងដែរ៕

^{ប្រភព ៖ ទទក}