អន្តរជាតិ៖ ព្រះចៅស៊ុលតង់ Ibrahim នៃប្រទេសម៉ាឡេស៊ីនឹងយាងទៅបំពេញទស្សនកិច្ចនៅឯប្រទេសចិន រយៈពេល ៤ថ្ងៃ។ នេះបើតាមការឱ្យដឹងពីក្រសួងការបរទេសចិន ជាមួយក្រុមពិធីការនៃរដ្ឋ Johor បានបញ្ជាក់នៅថ្ងៃពុធនេះ ដែលដំណើរទស្សនកិច្ចរបស់ព្រះចៅស៊៊ុលតង់ម៉ាឡេស៊ីត្រូវបានគេរំពឹងថា ទំនងជានឹងមានការស្វែងរកការគាំទ្រដើម្បីស្ដារឡើងវិញនូវគម្រោងហេដ្ឋារចនាសម្ព័ន្ធតភ្ជាប់ជាមួយប្រទេសសិង្ហបុរី។ 

គួរបញ្ជាក់ថា ព្រះចៅស៊ុលតង់ Ibrahim ត្រូវបានតែងតាំងជាព្រះមហាក្សត្រទី១៧ នៃប្រទេសម៉ាឡេស៊ីកាលពីខែមករាកន្លងទៅ ក្រោមប្រព័ន្ធរាជាធិបតេយ្យប្លែកជាងគេតែមួយគត់ ដែលតម្រូវឱ្យប្រមុខនៃរាជវង្សទាំងប្រាំបួនកាន់តំណែងជាព្រះចៅស៊ុលតង់ឆ្លាស់វេនគ្នារៀងរាល់ ៥ឆ្នាំម្តង និងមានអំណាចលើសពីប្រព័ន្ធនយោបាយដែលមានស្រាប់។ 

បើតាមប្រភពពីក្រសួងការបរទេសចិនដដែលបញ្ជាក់ថា ព្រះចៅស៊ុលតង់ Ibrahim ត្រូវបានទទួលការអញ្ជើញពីសំណាក់ប្រធានាធិបតីចិន លោក Xi Jinping ដោយផ្ទាល់ ដែលទ្រង់នឹងយាងទៅបំពេញទស្សនកិច្ចនៅចិន ចាប់ពីថ្ងៃទី១៩ ដល់ថ្ងៃទី២២ ខែកញ្ញាខាងមុខ។ 

គួររំឮកថា នាយករដ្ឋមន្រ្តីចិន លោក Li Qiang ទើបតែអញ្ជើញទៅបំពេញទស្សនកិច្ចនៅឯរាជធានី Kuala Lumpur ប្រទេសម៉ាឡេស៊ី កាលពីខែមិថុនាកន្លងទៅប៉ុណ្ណោះ និងបានបង្ហាញការគាំទ្រលើផែនការរបស់ម៉ាឡេស៊ីក្នុងការអភិវឌ្ឍការតភ្ជាប់របស់ខ្លួនតាមរយៈផ្លូវដែក East Coast Rail ដែលមានតម្លៃ ១០ពាន់លានដុល្លារអាមេរិក ទៅកាន់គម្រោងផ្លូវដែកមួយទៀតដែលគាំទ្រដោយចិនដូចគ្នានៅក្នុងប្រទេសឡាវ និងប្រទេសថៃ។ នាយករដ្ឋមន្រ្តីចិនថ្លែងថាសំណើនេះនឹងសម្រេចបាននូវផែនការសម្រាប់គម្រោងផ្លូវដែក Pan-Asia ដែលចេញដំណើរពីទីក្រុង Kunming ប្រទេសចិន ឆ្ពោះទៅកាន់ប្រទេសសិង្ហបុរី ដោយត្រូវបានគេសន្មតថានឹងឆ្លងកាត់រដ្ឋ Johor ជាទីដែលព្រះចៅស៊ុលតង់ Ibrahim ចង់ឱ្យមានការអភិវឌ្ឍផ្លូវដែកផងដែរ៕