ភ្នំពេញ៖ នៅថ្ងៃទី១៣ ខែកញ្ញា ឆ្នាំ២០២៤ មន្រ្តីសម្រុះសម្រួលដោះស្រាយវិវាទនៃ អ.ដ.ក. មានលោក ណុប គុជ, លោក វ៉ាន់ ប៊ុនថន និងលោកស្រី ណុប ចាន់លក្ខិណា បានសម្រុះសម្រួលផ្សះផ្សាវិវាទមួយករណីពាក់ព័ន្ធនឹងកិច្ចសន្យាខ្ចីប្រាក់ និងធ្វើកំណត់ហេតុព្រមព្រៀងបញ្ចប់វិវាទបានដោយជោគជ័យ។

សូមបញ្ជាក់ថា សំណុំរឿងវិវាទនេះ កើតចេញពីការមិនអនុវត្តកាតព្វកិច្ចនៃកិច្ចសន្យាខ្ចីប្រាក់ តាំងពីឆ្នាំ២០២០ ដោយកន្លងមក គូភាគីបានព្យាយាមរកដំណោះស្រាយវិវាទ ប៉ុន្តែនៅតែមិនទទួលបានជោគជ័យ។ ចំពោះវិវាទនេះ ភាគីម្ចាស់បំណុលក៏បានប្ដឹងសុំអន្តរាគមន៍ទៅស្ថាប័នផ្សេងៗ មួយចំនួនផងដែរ ដើម្បីឱ្យជួយរកដំណោះស្រាយ ទើបតែចុងក្រោយនេះ ករណីវិវាទខាងលើបានដាក់មកអាជ្ញាធរដោះស្រាយវិវាទក្រៅប្រព័ន្ធតុលាការ (អ.ដ.ក.) ដើម្បីស្នើសុំសម្រុះសម្រួលផ្សះផ្សាវិវាទបញ្ចប់វិវាទ។

ក្រោយពីទទួលបានពាក្យស្នើសុំរបស់ភាគី មន្រ្តី អ.ដ.ក. បានពិនិត្យ សិក្សា ស្រាវជ្រាវដោយយកចិត្តទុកដាក់ និងបានដោះស្រាយបញ្ចប់វិវាទនេះ ដោយផ្អែកលើឆន្ទៈព្រមព្រៀងរបស់គូភាគី យ៉ាងឆាប់រហ័ស។

គូភាគីវិវាទបានសះជាជាមួយគ្នា ហើយបានផ្តិតមេដៃលើកំណត់ហេតុព្រមព្រៀងបញ្ចប់វិវាទ ដែលផ្អែកតាមច្បាប់ កំណត់ហេតុព្រមព្រៀងបញ្ចប់វិវាទនេះមានអានុភាពអនុវត្តដូចសាលក្រមស្ថាពររបស់តុលាការដែរ៕

សម្រាប់ប្រជាពលរដ្ឋដែលមានចម្ងល់ ឬចង់ទទួលបានព័ត៌មានលម្អិតបន្ថែមពី អ.ដ.ក. អាចទាក់ទងមកកាន់លេខទូរសព្ទ ០៩៩ ៤៥៦ ១៥៦, ០៩៩ ៩៨៣ ៣៥៨ និង ០៩៣ ៩៨៣ ៣៥៨ ឬតាមរយៈទំព័រហ្វេសប៊ុក (Facebook) ឬ តេឡេក្រាម (Telegram) ផ្លូវការរបស់អាជ្ញាធរដោះស្រាយវិវាទក្រៅប្រព័ន្ធតុលាការ ឬអញ្ជើញមកកាន់អគ្គលេខាធិការដ្ឋាន អ.ដ.ក. ដែលមានទីតាំងស្ថិតក្នុងបណ្ឌិត្យសភាភូមិន្ទយុត្តិធម៌កម្ពុជា ស្ថិតនៅតាមបណ្ដោយមហាវិថីឈ្នះឈ្នះ ភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ៕