អង់គ្លេស៖ រដ្ឋាភិបាល​អង់គ្លេសបានឱ្យដឹងនៅថ្ងៃចន្ទម្សិលមិញនេះថា ខ្លួននឹង​ផ្អាក​ការ​នាំ​ចេញ​អាវុធ​មួយ​ចំនួន​ទៅ​កាន់​ប្រទេស​អ៊ីស្រាអែល ព្រោះ​អាវុធ​ដែលនាំចេញទាំង​នោះ​អាច​នឹង​ត្រូវ​ប្រើ​ក្នុងគោលដៅ​បំពាន​ច្បាប់​អន្តរជាតិ។ រដ្ឋមន្ត្រីការបរទេសអង់គ្លេស លោក David Lammy ថ្លែងថា គេអាចមើលឃើញនូវហានិភ័យយ៉៉ាងជាក់ច្បាស់ ដែលសព្វាវុធមួយចំនួនអាចត្រូវបានប្រើប្រាស់ដើម្បី "ប្រព្រឹត្ត ឬសម្របសម្រួលនាំឱ្យមានការរំលោភបំពានធ្ងន់ធ្ងរលើច្បាប់មនុស្សធម៌អន្តរជាតិ" ។

លោក David Lammy បានថ្លែងប្រាប់សមាជិកសភាថា ការសម្រេចខាងលើនេះមានជាប់ទាក់ទងនឹងអាជ្ញាបណ្ណនាំចេញប្រហែល ៣០ ក្នុងចំណោម ៣៥០អាជ្ញាបណ្ណទៅកាន់ប្រទេសអ៊ីស្រាអែល។ អង់គ្លេស​ បានក្លាយជាប្រទេសដែលស្ថិត​ក្នុង​ចំណោម​សម្ព័ន្ធមិត្ត​មួយចំនួនរបស់អ៊ីស្រាអែល ដែលរដ្ឋាភិបាល​កំពុង​ស្ថិត​ក្រោម​សម្ពាធ​កាន់​តែ​ខ្លាំង​ឡើង​ក្នុង​ការ​បញ្ឈប់​ការ​នាំ​ចេញ​សព្វាវុធ​ ដោយ​សារ​តែ​ចំនួន​អ្នក​ស្លាប់​មានកាន់តែច្រើនក្នុង​សង្គ្រាម​ដែលមានរយៈ​ពេលជាង ១១ ខែ​នៅ​តំបន់ហ្គាហ្សា។

រដ្ឋមន្ត្រីការពារជាតិអ៊ីស្រាអែល លោក Yoav Gallant ក៏បានរិះគន់ភ្លាមៗទៅលើការសម្រេចចិត្តរបស់ចក្រភពអង់គ្លេស ក្នុងការផ្អាកការនាំចេញអាវុធមួយចំនួនទៅកាន់អ៊ីស្រាអែល ដោយបញ្ជាក់ថា លោកមានការខកចិត្តយ៉ាងខ្លាំងបន្ទាប់ពីបានទទួលដំណឹងអំពីការហាមឃាត់ដែលធ្វើឡើងដោយរដ្ឋាភិបាលចក្រភពអង់គ្លេសលើអាជ្ញាប័ណ្ណនាំចេញដែលរួមចំណែកដល់វិស័យការពារជាតិរបស់អ៊ីស្រាអែល។

ដោយឡែក រដ្ឋមន្ត្រីការបរទេសអ៊ីស្រាអែល លោក Israel Katz បានថ្លែងនៅលើបណ្ដាញសង្គម X កាលពីថ្ងៃចន្ទម្សិលមិញនេះថា ការសម្រេចចិត្តរបស់ចក្រភពអង់គ្លេសលើការនាំចេញអាវុធនេះ ហាក់ជាសារដែលភ្ជាប់នូវបញ្ហាយ៉ាងខ្លាំងទៅកាន់អង្គការភេរវករ Hamas និងភ្នាក់ងាររបស់ពួកគេនៅក្នុងប្រទេសអ៊ីរ៉ង់"៕