សហរដ្ឋអាមេរិក៖ ការិយាល័យប៉ូលិស Cochise បានឱ្យដឹងកាលពីថ្ងៃព្រហស្បតិ៍ម្សិលមិញនេះថា បុរសរស់នៅរដ្ឋ Arizona ម្នាក់ត្រូវបានគេប្រកាសតាមចាប់ខ្លួន បន្ទាប់ពីបានគំរាមកំហែងតាមប្រព័ន្ធផ្សព្វផ្សាយសង្គមថាខ្លួនមានបំណងសម្លាប់អតីតប្រធានាធិបតីអាមេរិក លោក Donald Trump ។ លោក Donald Trump ដែល​ជា​បេក្ខភាព​ប្រធានាធិបតីរបស់​គណបក្ស​សាធារណរដ្ឋ ​កំពុង​ស្ថិត​នៅ​ក្នុងតំបន់ Cochise ខណៈ​ដែល​លោក​ធ្វើ​ទស្សនកិច្ច​នៅ​តាមព្រំដែននៃ​សហរដ្ឋ​អាមេរិក​ជាមួយ​ប្រទេស​ម៉ិកស៊ិក​ ដែលជា​ផ្នែកមួយ​នៃ​យុទ្ធនាការឃោសនារកសំឡេងឆ្នោត​របស់​លោក។

ការិយាល័យប៉ូលិសដដែលក៏បានឱ្យដឹងថា បុរសដែលត្រូវគេតាមចាប់ខ្លួននោះមានឈ្មោះ Ronald Lee Syvrud អាយុ  ៦៦ឆ្នាំ ហើយបុគ្គលរូបនេះក៏មានដីកាចាប់ខ្លួនជាច្រើនពីរដ្ឋ Wisconsin ផងដែរ។ ដោយឡែក នៅពេលដែលគេបានសួរនាំរូបលោកអំពីការគម្រាមសម្លាប់នេះ លោក Trump បានឆ្លើយថា៖ "ទេ! ខ្ញុំមិនបានដឹងឮអ្វីទេ! ប៉ុន្តែខ្ញុំមិនមានការភ្ញាក់ផ្អើលអ្វីនោះឡើយ ហើយមូលហេតុគឺដោយសារតែខ្ញុំចង់ធ្វើរឿងអាក្រក់សម្រាប់តែមនុស្សអាក្រក់ប៉ុណ្ណោះ"។

គួរបញ្ជាក់ថា នេះគឺជាករណីគំរាមដល់អាយុជីវិតរបស់បេក្ខភាពប្រធានាធិបតីរូបនេះចុងក្រោយបង្អស់ ខណៈការបោះឆ្នោតនឹងឈានចូលមកដល់នាថ្ងៃទី០៥ ខែវិច្ឆិកាខាងមុខ។ ជាក់ស្ដែង កាលពីដើមខែសីហានេះ បុរសម្នាក់រស់នៅរដ្ឋ Virginia ត្រូវបានចោទប្រកាន់ពីបទគំរាមកំហែងដល់អនុប្រធានាធិបតី Kamala Harris ហើយបុរសនៅរដ្ឋ New Hampshire ម្នាក់ត្រូវបានចាប់ខ្លួនកាលពីខែធ្នូ ពីបទគំរាមកំហែងសម្លាប់បេក្ខជនប្រជែងតំណែងប្រធានាធិបតីនៃគណបក្សសាធារណរដ្ឋ។ មិនត្រឹមតែប៉ុណ្ណោះ កាល​ពី​ខែ​កក្កដានេះ លោក Trump ត្រូវ​បាន​គេ​បាញ់​ចំ​ត្រចៀក​ខាងស្ដាំ ដែលជា​ការ​ប៉ុនប៉ង​ធ្វើ​ឃាតលើរូបលោក ដោយហេតុការណ៍នេះបាន​បណ្តាល​ឲ្យ​មនុស្ស​ពីរ​នាក់​ផ្សេង​ទៀត​រង​របួស និង​មនុស្ស​ម្នាក់​ស្លាប់៕