អន្តរជាតិ៖ រដ្ឋាភិបាលក្រុងហាណួយថ្លែងថា នាវាកងឆ្មាំសមុទ្រវៀតណាមកំពុងធ្វើដំណើរចេញទៅកាន់ប្រទេសហ្វីលីពីនដើម្បីចូលរួមក្នុងសមយុទ្ធហ្វឹកហ្វឺនយោធាមួយ ដែលជាកិច្ចផ្លាស់ប្តូររួមគ្នាលើកដំបូងនៃប្រទេសទាំងពីរដែលកំពុងមានជម្លោះជាមួយប្រទេសចិនជុំវិញបញ្ហាសមុទ្រចិនខាងត្បូង។ 

គួរបញ្ជាក់ថា រដ្ឋាភិបាលចិនបានសម្រេចទាមទារស្ទើរតែទាំងស្រុងទៅលើអធិបតេយ្យលើសមុទ្រចិនខាងត្បូង ខណៈវៀតណាម ហ្វីលីពីន និងប្រទេសមួយចំនួនទៀតក្នុងតំបន់អាស៊ីអាគ្នេយ៍ក៏បានទាមទារដូចគ្នាទៅលើដែនកោះ កូនកោះ ថ្មប៉ប្រះទឹក និងច្រាំងថ្មចោទជាច្រើននៅក្នុងផ្លូវទឹកយុទ្ធសាស្ត្រដ៏សំខាន់មួយនេះ។

ក្នុងដំណើរទស្សនកិច្ចទៅកាន់ប្រទេសវៀតណាមកាលពីខែមករា លោកប្រធានាធិបតីហ្វីលីពីន Ferdinand Marcos បាននាំឱ្យប្រទេសទាំងពីររួមគ្នាជំរុញកិច្ចសហប្រតិបត្តិការឆ្មាំសមុទ្រនៅសមុទ្រចិនខាងត្បូង និង "ដោះស្រាយឧប្បត្តិហេតុនៅលើដែនសមុទ្រនេះដោយសន្តិវិធី"។ 

ក្រសួងការពារជាតិវៀតណាមបានឱ្យដឹងតាមរយៈសេចក្ដីថ្លែងការណ៍មួយថា នាវា CSB 8002 ទម្ងន់ ២,៤០០តោនបានចាកចេញពីដែនទឹកវៀតណាមកាលពីថ្ងៃពុធ ទី៣១ ខែកក្កដា សម្រាប់បេសកកម្មដែលមានអត្ថន័យ និងសារៈសំខាន់យ៉ាងជ្រាលជ្រៅក្នុងផ្លូវនយោបាយ។ ដំណើរទស្សនកិច្ចនេះគឺជាឱកាសសម្រាប់កងកម្លាំងឆ្មាំសមុទ្រទាំងពីរលើការជំរុញកិច្ចសហប្រតិបត្តិការលើគ្រប់ជ្រុងជ្រោយ និងលើកកំពស់សមត្ថភាពអនុវត្តច្បាប់លើផ្ទៃសមុទ្រ ព្រមទាំងរួមចំណែកថែរក្សាសន្តិភាព ស្ថិរភាព សន្តិសុខ និងសុវត្ថិភាពក្នុងតំបន់ដែនសមុទ្រពាក់ព័ន្ធ ក៏ដូចជាក្នុងតំបន់។

តាមរយៈសេចក្ដីថ្លែងការណ៍ដដែលបញ្ជាក់ថា កងកម្លាំងប្រទេសទាំងពីរនឹងធ្វើសមយុទ្ធរួមគ្នាលើកិច្ចការរុករក និងជួយសង្គ្រោះ, កិច្ចការពារអគ្គិភ័យ និងការអនុវត្តការប៉ះទង្គិចលើដែនសមុទ្រ។ ក្រសួងការបរទេសវៀតណាមធ្លាប់បញ្ជាក់់ដែរថា កាលពីពាក់កណ្តាលខែកក្កដាកន្លងទៅ វៀតណាមបានដាក់ពាក្យប្តឹងទៅអង្គការសហប្រជាជាតិលើបញ្ហាពាក់ព័ន្ធនឹងតំបន់មួយលាតសន្ធឹងក្នុងចម្ងាយប្រមាណ ៣៧០គីឡូម៉ែត្រក្នុងសមុទ្រចិនខាងត្បូង៕