កីឡា៖ ក្រុមការងាររៀបចំព្រឹត្តិការណ៍កីឡាអូឡាំពិក ទីក្រុងប៉ារីស នៅថ្ងៃចន្ទនេះបានបន្តលុបចោលការហ្វឹកហាត់សាកល្បងលើវិញ្ញាសាហែលទឹក នៃវិញ្ញាសាកីឡាទ្រីយ៉ាត្លុង ដែលជាការលុបចោលការហ្វឹកហាត់សាកល្បងថ្ងៃទីពីរជាប់ៗគ្នា បន្ទាប់ពីភ្លៀងធ្លាក់ខ្លាំងនាពេលថ្មីៗនេះបានបង្កឱ្យមានផលប៉ះពាល់ដល់កម្រិតគុណភាពទឹកនៅក្នុងតំបន់ ជាពិសេសនៅដងទន្លេ សែន (Seine)។

គួរបញ្ជាក់ថា ការហ្វឹកហាត់សាកល្បងកាលពីថ្ងៃអាទិត្យម្សិលមិញនេះក៏ត្រូវបានប្រកាសលុបចោលផងដែរ បន្ទាប់ពីការធ្វើតេស្តសាកល្បងកម្រិតគុណភាពទឹកលើដងទន្លេ Seine នាថ្ងៃសៅរ៍បានបង្ហាញថា គុណភាពទឹកមិនបំពេញតាមកម្រិតស្ដង់ដារដែលជាតម្រូវការ។ យ៉ាងណាក្ដី ផលប៉ះពាល់កើតមានតែទៅលើការហ្វឹកហាត់សាកល្បងវិញ្ញាសាហែលទឹកប៉ុណ្ណោះ ដោយវិញ្ញាសាពីរទៀតនៃកីឡាទ្រីយ៉ាត្លុងគឺវិញ្ញាសាជិះកង់ និងរត់ នៅបន្តបានជាធម្មតាមិនមានផលប៉ះពាល់អ្វីឡើយ។ 

ក្រុមការងាររៀបចំព្រឹត្តិការណ៍កីឡាអូឡាំពិក តាមរយៈសេចក្ដីថ្លែងការណ៍មួយនាថ្ងៃចន្ទនេះបានឱ្យដឹងថា "ដោយផ្អែកលើការព្យាករណ៍អាកាសធាតុសម្រាប់រយៈពេល ៣៦ម៉ោងបន្ទាប់, ព្រឹត្តិការណ៍កីឡាអូឡាំពិក ទីក្រុងប៉ារីស ឆ្នាំ២០២៤ និងសហព័ន្ធកីឡាទ្រីយ៉ាត្លុងពិភពលោក មានទំនុកចិត្តថាគុណភាពទឹកនឹងត្រលប់មកក្រោមកម្រិតកំណត់ មុនពេលចាប់ផ្តើមការប្រកួតកីឡាទ្រីយ៉ាត្លុងនៅថ្ងៃទី៣០ ខែកក្កដាខាងមុខ"៕