កម្សាន្ត៖ ផលិតកម្ម Apple Studio បានសម្រេចបោះទុនធំ ក្នុងការផលិតខ្សែភាពយន្តថ្មីមួយ ដែលនឹងឃើញមានអតីតតួអង្គសំខាន់របស់ Marvel ក្នុងខ្សែស្រឡាយភាពយន្ត Avengers ពីររូបរួមគ្នាគឺ Chris Evans និងអ្នកនាង Scarlett Johansson បង្ហាញមុខក្នុងភាពយន្តនេះ។

ខ្សែភាពយន្តថ្មី ដែលត្រូវចាក់នៅលើសេវាកម្មទស្សនាភាពយន្ត Online នេះ មានចំណងជើងថា Ghosted ដែលខ្សែភាពយន្តនេះ នឹងស្ថិតក្រោមការគ្រប់គ្រងរបស់អ្នកដឹកនាំរឿង លោក Dexter Fletcher ដែលជាម្ចាស់ស្នាដៃខ្សែភាពយន្ត Rocketman and Bohemian Rhapsody ដែលឈ្នះពាន Oscar ជាច្រើនកន្លងមក។

បើតាមប្រភពសារព័ត៌មានតាមដានខ្សែភាពយន្ត Hollywood ជាច្រើនបានអះអាងឱ្យដឹងថា​ ខ្សែភាពយន្តដែលនឹងត្រូវផលិតឡើងនេះ គឺជាភាពយន្តបែបរូមែនទិក, វាយប្រហារ និងផ្សងព្រេងរួមបញ្ចូលគ្នា។ នេះគឺជាខ្សែភាពយន្តទី២ ហើយសម្រាប់តារាសម្តែងស្រី Scarlett Johansson ក្រោយពីនាងបានបញ្ចប់កុងត្រាជាមួយផលិតកម្ម Disney ដោយមានរឿងក្តីក្តាំជុំវិញខ្សែភាពយន្តទោល Black Widow ដោយក្រោយមកនាងបានចុះកិច្ចសន្យាថតខ្សែភាពយន្តដំបូងដែលកំពុងដំណើរការថតនៅប្រទេសអេស្ប៉ាញ។

ដោយឡែក Chris Evans ដែលគ្រប៉គ្នាស្គាល់ថាជាតួអង្គ Captain America ក៏បានបញ្ចប់កិច្ចសន្យារបស់ខ្លួនជាមួយ Disney ដូចគ្នា ក្រោយខ្សែភាពយន្ត Avengers : ENDGAME ត្រូវបានចាក់បញ្ចាំងកាលពីឆ្នាំ ២០១៩។ ក្រោយមកលោកក៏បានលេចមុខក្នុងខ្សែភាពយន្តផ្សេងៗជាហូរហែរ ដែលចុងក្រោយសំដែងជាតួអង្គ Lloyd Hansen ក្នុងរឿង The Gray Man ដែលដឹកនាំដោយ Director នៃរឿង Avengers កន្លងមកគឺបងប្អូនត្រកូល Russo ដែលនឹងដាក់ឱ្យទស្សនាក្នុង Netflix នាពេលឆាប់ៗខាងមុខនេះ៕