កីឡា៖ គូប្រជែងនៃពានរង្វាន់ Finalissima ២០២៥ ត្រូវបានរកឃើញហើយ ពោលគឺម្ចាស់ជើងឯកបាល់ទាត់ទ្វីបអឺរ៉ុប UEFA Euro ២០២៤ គោជល់អេស្ប៉ាញ នឹងត្រូវជួបជាមួយម្ចាស់ជើងឯកបាល់ទាត់ទ្វីបអាមេរិក Copa America ២០២៤ ពពកខៀវអាហ្សង់ទីន ខណៈម្ចាស់ជើងឯកទាំងពីរនឹងត្រូវប្រជែងពានរង្វាន់នេះនៅឆ្នាំ២០២៥។ 

គួរបញ្ជាក់ថា ពានរង្វាន់ Finalissima ធ្វើឡើងលើកដំបូងបង្អស់កាលពីឆ្នាំ២០២២ ដែលកាលណោះម្ចាស់ជើងឯកបាល់ទាត់ទ្វីបអាមេរិកខាងត្បូងអាហ្សង់ទីន ជួបជាមួយម្ចាស់ជើងឯកបាល់ទាត់ទ្វីបអឺរ៉ុបអ៊ីតាលី នាកីឡដ្ឋានជាតិ Wembley ទីក្រុងឡុងដ៍ ប្រទេសអង់គ្លេស ដែលអាហ្សង់ទីនជាអ្នកគ្រងជើងឯកជាមួយជ័យជម្នះ ៣-០។ តាមពិតទៅ ពានរង្វាន់នេះក៏ធ្លាប់ធ្វើឡើង ២លើកផងដែរកាលពីឆ្នាំ១៩៨៥ និង១៩៩៩៣ ដែលកាលណោះបារាំងគឺជាជើងឯកឆ្នាំ១៩៨៥ ដោយយកឈ្នះអ៊ុយរ៉ូហ្គាយ និងអាហ្សង់ទីនគឺជាជើងឯកឆ្នាំ១៩៩៣ ដោយយកឈ្នះដាណឺម៉ាក។ 

ពានរង្វាន់ Finalissima ២០២២ ធ្វើឡើងកាលពីថ្ងៃទី០១ ខែមិថុនា ឆ្នាំ២០២២ ខណៈពានរង្វាន់ Finalissima ២០២៥ ត្រូវគេរំពឹងថានឹងធ្វើឡើងនៅរដូវក្ដៅ ឆ្នាំ២០២៥ ដោយកាលបរិច្ឆេទ និងទីតាំងប្រកួតជាក់លាក់មិនទាន់ត្រូវបានប្រកាសនៅឡើយទេ។ គួរឱ្យដឹងថា ក្រៅពីការប្រកួតជម្រុះ World Cup ពានរង្វាន់ Finalissima ២០២៥ គឺជាពានរង្វាន់ធំតែមួយគត់នៅក្នុងទ្វីបអឺរ៉ុប និងអាមេរិកខាងត្បូងមុនឈានដល់ការប្រកួត World Cup ២០២៦ ដែលធ្វើឡើងនៅទឹកដីអាមេរិក កាណាដា និងម៉ិកស៊ិក៕