រាជធានីភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នាព្រឹកថ្ងៃព្រហស្បតិ៍នេះ បានឯកភាពលើការស្នើសុំបញ្ចូលក្របខណ្ឌរដ្ឋជូនទៅកាន់លោក គង់ បុរាណ ក្រោយពីកូនប្រុសនៃព្រឹទ្ធាចារ្យកោសល្យវោហារ គង់ ណៃ បានគោរពស្នើសុំប្រមុខរាជរដ្ឋាភិបាល និងថ្នាក់ដឹកនាំផ្ទាល់កាលពីពេលថ្មីៗ។

នៅលើគណនីហ្វេសប៊ុក លោក គង់ បុរាណ បានបង្ហោះសារមួយយ៉ាងដូច្នោះថា៖ «ខ្ញុំបាទឈ្មោះ គង់ បុរាណ កូនប្រុសតែម្នាក់គត់ក្នុងចំណោម បងប្អូន ១០នាក់ ដែលបានបន្តវេនចាប៉ីពីលោកឪពុក គង់ ណៃ តែសព្វថ្ងៃខ្ញុំមិនទាន់មានក្របខណ្ឌរដ្ឋនៅឡើយទេ។ ខ្ញុំចង់បាន ក្របខណ្ឌរដ្ឋមួយកន្លែង ដើម្បីជួយបម្រើរដ្ឋដូចពុកខ្ញុំ និងជីវភាពសម្រាប់ថ្ងៃខាងមុខ។ ដូច្នេះសូមពុកម៉ែ បងប្អូន អ៊ុំ យាយតា ជួយចែកចាយសារ (សៀរ) ផង ក្រែងដំណឹងនេះជ្រាបដល់ប្រមុខថ្នាក់ដឹកនាំ រាជរដ្ឋាភិបាលលោកជ្រាបដឹង។ សូមអរគុណ និងអរព្រះគុណ»។

ចំពោះសារខាងលើនេះ នៅព្រឹកថ្ងៃទី១១ ខែកក្កដានេះ សម្តេចធិបតីបានសរសេរសារមួយយ៉ាងដូច្នេះថា៖ «ខ្ញុំបានឃើញសាររបស់ប្អូនប្រុស គង់ បុរាណ ដែលត្រូវជាកូនប្រុសបង្កើតរបស់លោកតា គង់ ណៃ ដែលប្អូនបានស្នើសុំចូលបម្រើក្នុងក្របខ័ណ្ឌរដ្ឋ ដើម្បីបានដើរតាមគន្លងរបស់លោកឪពុក ហើយជាពិសេសប្អូនមានជំនាញចាប៉ី ដែលអាចបន្តវេនពីលោកឪពុករបស់ប្អូន។ ខ្ញុំឯកភាពតាមសំណើរបស់ប្អូនប្រុស គង់ បុរាណ។ ខ្ញុំបានប្រគល់ភារកិច្ចជូនឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងលោកជំទាវ រដ្ឋមន្ត្រីក្រសួងវប្បធម៌ និងវិចិត្រសិល្បៈ ដើម្បីរៀបចំកិច្ចការងារនេះ។ សូមជូនពរប្អូនប្រុស ទទួលបានជោគជ័យក្នុងការបន្តវេនចាប៉ីពីលោកតា គង់ ណៃ»៕