ចិន៖ អាជ្ញាធរផ្នែកធាតុអាកាសរបស់ចិនបានឱ្យដឹងនៅថ្ងៃទី០៤ ខែកក្កដានេះថា សីតុណ្ហភាពនៅក្នុងតំបន់ភាគច្រើននៅទូទាំងប្រទេសចិននឹងកើនឡើងខ្ពស់ក្នុងរយៈពេលប៉ុន្មានខែខាងមុខនេះ ដែលជាសញ្ញានៃការកើនឡើងកំដៅខ្លាំងនៅក្នុងរដូវក្ដៅដែលនឹងឈានចូលមកដល់។ គួរឱ្យដឹងថា បច្ចុប្បន្ននេះចិនកំពុងជួបប្រទះនូវបញ្ហាអាកាសធាតុដ៏អាក្រក់មួយ ខណៈភ្លៀងធ្លាក់ខ្លាំង និងទឹកជំនន់វាយលុកភាគខាងត្បូងប្រទេស ខណៈនៅភាគខាងជើង និងតំបន់កណ្តាលបានជួបប្រទះនូវការកើនឡើងកំដៅខ្លាំងដល់សីតុណ្ហភាពបំបែកកំណត់ត្រាមួយ ដែលបានបង្កផលប៉ះពាល់ទៅលើការដាំដំណាំ និងលើបណ្តាញអគ្គិសនី។
យោងតាមទិន្នន័យផ្លូវការឱ្យដឹងថា ចិនបានជួបប្រទះនូវបញ្ហាអាកាសធាតុក្តៅខុសពីធម្មតាប៉ុន្មានឆ្នាំចុងក្រោយជាប់ៗគ្នា ជាមួយនឹងសីតុណ្ហភាពជាមធ្យមចាប់ពីខែមីនា ដល់ខែឧសភាក្នុងកម្រិតខ្ពស់បំផុតមួយមិនធ្លាប់មានក្នុងការតាមដានកំណត់ត្រាសីតុណ្ហភាពគិតចាប់តាំងពីឆ្នាំ១៩៦១មក។ ការព្រមានពីអ្នកព្យាករណ៍អាកាសធាតុរបស់ចិននៅឯសន្និសីទសារព័ត៌មាននៅទីក្រុងប៉េកាំង នឹងជូនដំណឹងដល់អាជ្ញាធរឱ្យត្រៀមខ្លួនសម្រាប់រដូវក្តៅដែលមានរលកកំដៅ និងសីតុណ្ហភាពហក់ខ្ពស់គួរឱ្យព្រួយបារម្ភរយៈពេល ២ឆ្នាំជាប់ៗគ្នា។
អ្នកជំនាញផ្នែកអាកាសធាតុបញ្ជាក់ថា ប្រទេសក្នុងទ្វីបអាស៊ីភាគច្រើនបានជួបប្រទះនឹងការកើនឡើងកម្ដៅខ្លាំងក្នុងរយៈពេលប៉ុន្មានខែកន្លងមកនេះ ដែលកត្តានេះបានវិវត្តន៍ទៅកាន់ស្ថានភាពកាន់តែអាក្រក់ឡើងដោយសារការប្រែប្រួលអាកាសធាតុ។ ទន្ទឹមនឹងនេះ អាជ្ញាធរក៏បានព្រមានអំពីព្យុះទីហ្វុងចំនួន ២ ដែលនឹងអាចបោកបក់មកលើប្រទេសចិនផងដែរ ក្នុងអំឡុងខែកក្កដានេះ៕
ព័ត៌មានជាច្រើនទៀតសម្រាប់អ្នក
