កូរ៉េខាងត្បូង៖ បើតាមរបាយការណ៍របស់ប៉ូលិសបានឱ្យដឹងថា ក្នុងហេតុការណ៍រថយន្តមួយគ្រឿងបានបើកបុកហ្វូងមនុស្ស ដែលបានផ្តាច់ជីវិតមនុស្សយ៉ាងតិច ៩នាក់នៅក្នុងរដ្ឋធានីសេអ៊ូល របស់កូរ៉េខាងត្បូង។ ហេតុការណ៍គ្រោះថ្នាក់ដ៏គួរឱ្យតក់ស្លុតនេះកើតឡើងនៅវេលាម៉ោង ៩ និង៣០នាទីយប់មិញ (ម៉ោងនៅកូរ៉េខាងត្បូង)។

បើតាមការរាយការណ៍ដោយទីភ្នាក់ងារសារព័ត៌៌មាន Yonhap ឱ្យដឹងថា ជនបង្កដែលជាអ្នកបើកបររថយន្តគឺជាបុរសដែលមានវ័យប្រមាណ ៦០ឆ្នាំ បានបើករថយន្តបុករះទៅលើហ្វូងមនុស្សដែលកំពុងឈរប្រមូលផ្តុំគ្នារង់ចាំភ្លើងសញ្ញាអនុញ្ញាតឱ្យឆ្លងផ្លូវ។ ក្រៅពីអ្នកស្លាប់ចំនួន ៩នាក់ មនុស្សចំនួន ៤នាក់ផ្សេងទៀតក៏ត្រូវបានបញ្ជូនទៅកាន់មន្ទីរពេទ្យភ្លាមៗ ខណៈប៉ូលិសអះអាងថានឹងបើកការស៊ើបអង្កេតរកមូលហេតុនៃគ្រោះថ្នាក់ចរាចរណ៍នេះ។ 

យោងតាមសារព័ត៌មានក្នុងស្រុកបានឲ្យដឹងថា រថយន្តបង្កបានបើកបរក្នុងទិសដៅបញ្ច្រាសផ្លូវ ដោយបានជ្រុលទៅបុករថយន្តពីរគ្រឿងទៀត មុនពេលដែលវាបានបន្តបុករះទៅលើអ្នកដំណើរថ្មើរជើងដែលកំពុងដើរឆ្លងផ្លូវ។ ប៉ូលិសបញ្ជាក់ថា ឧបទ្ទវហេតុនេះបានកើតឡើងនៅផ្លូវបំបែកមួយនៅជិតសាលាក្រុងសេអ៊ូល។ អ្នកបើកបរ​រថយន្តខាងលើ​ដែល​ត្រូវ​ចាប់ខ្លួន​នៅ​កន្លែង​កើតហេតុ​បាន​ប្រាប់​ប៉ូលិស​ថា នៅសុខៗរថយន្ត​បាន​បន្ថែម​ល្បឿន​លឿនខ្លាំងដោយខ្លួនឯង​។

គួរបញ្ជាក់ថា នៅក្នុងប្រទេសកូរ៉េខាងត្បូង ការកំណត់ល្បឿនសម្រាប់អ្នកបើកបររថយន្តគឺ ៥០គីឡូម៉ែត្រក្នុងមួយម៉ោងសម្រាប់ផ្លូវធម្មតា និង ៣០គីឡូម៉ែត្រក្នុងមួយម៉ោងសម្រាប់ផ្លូវដែលមានភាពមមាញឹក និងនៅទីប្រជុំជន។ បើតាមរបាយការណ៍ឱ្យដឹងថា កាលពីឆ្នាំ២០២២ ចំនួនអ្នកថ្មើរជើងដែលបានបាត់បង់ជីវិតមានចំនួន ៣៥ភាគរយនៃចំនួនមនុស្សដែលស្លាប់ក្នុងហេតុការណ៍គ្រោះថ្នាក់ចរាចរណ៍សរុប៕