បន្ទាយមានជ័យ ៖ លោក កែ គឹមយ៉ាន សមាជិកគណៈអចិន្ត្រៃយ៏គណៈកម្មាធិការកណ្ដាលគណបក្សប្រជាជនកម្ពុជានិងជាប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ បានលេីកឡេីងថា សន្តិភាព និងរាល់សមិទ្ធផលដែលយើងសម្រេចបានមកដល់ពេលនេះ គឺបានមកពីការយកអាយុជីវិតធ្វើជាដើមទុន ពីពលិកម្មដ៏ធំធេង និងការប្រឹងប្រែងអស់ពីកម្លាំងកាយ កម្លាំងចិត្តរបស់ថ្នាក់ដឹកនាំគណបក្ស អង្គការចាត់តាំង គណបក្សគ្រប់ថ្នាក់ យុទ្ធជន យុទ្ធនារី សមាជិក សមាជិកាគណបក្ស និងជនរួមជាតិយើងច្រើនឥតគណនាដើម្បីជាតិមាតុភូមិ និងជីវិតរស់នៅរបស់ខ្លួន ព្រមទាំងការជួយឧបត្ថម្ភគាំទ្រដ៏ស្មោះសរពីបណ្តាប្រទេសជាមិត្ត និងសហគមន៍ អន្តរជាតិ។

លោក កែ គឹមយ៉ាន បានលេីកឡេីងបែបនេះនៅក្នុងឱកាសប្រារព្ធមីទ្ទីង អបអរសាទរខួបទី៧៣ឆ្នាំ ថ្ងៃបង្កើតគណបក្សប្រជាជនកម្ពុជា នៅទីស្នាក់ការគណបក្សប្រជាជនកម្ពុជា ខេត្តបន្ទាយមានជ័យ ដែលមានក្រុមការងារ សមាជិក-សមាជិកាបក្សទាំង៩ក្រុង-ស្រុក ចូលរួមសរុបជាង៨០០នាក់ នៅថ្ងៃទី៣០ ខែមិថុនា ឆ្នាំ២០២៤។

លោក កែ គឹមយ៉ាន ក៏បានបញ្ជាក់ទៀតថា យេីងចងចាំជានិច្ចនូវគុណូបការៈដ៏ថ្លៃថ្លានេះ ហើយប្តេជ្ញាថែរក្សារាល់សមិទ្ធផលរបស់ជាតិឱ្យគង់វង្សជារៀងដរាប ដោយមិនអនុញ្ញាតឱ្យអនុភាព ប្រតិកិរិយាណាមកបំផ្លាញបានឡើយ។ លោកបន្តថា គណបក្សប្រជាជនកម្ពុជា ប្តេជ្ញាបន្តកសាងប្រទេសជាតិ ឱ្យកាន់តែរីកចម្រើនឡើង ក្លាយជាប្រទេសជឿនលឿនមួយក្នុងតំបន់ ជាសង្គមប្រកបដោយអរិយធម៌ និងសេចក្តីស្រឡាញ់ ដោយគ្មានការកើតឡើងជាថ្មីនូវសង្គ្រាម អំពើប្រល័យពូជសាសន៍ និងការបែកបាក់ផ្ទៃក្នុងជាតិ ដូចពេលមុនទៀត ។ លើមាគ៌ានៃជ័យជម្នះ គណបក្សប្រជាជនកម្ពុជា ក្រោមការដឹកនាំដោយសម្តេចអគ្គមហាសេនាបតីតេជោ ហ៊ុន សែន ដែលបានដឹកនាំគណបក្ស និងដឹកនាំប្រទេសជាតិឆ្លងកាត់ដំណាក់កាលនានាដ៏ លំបាកស្មុគស្មាញ និងតស៊ូប្តូរផ្តាច់ប្រកបដោយគតិបណ្ឌិត ភាពឈ្លាសវៃ ប៉ិនប្រសប់ និងភាពអង់អាចបំផុត។ សម្តេចតេជោ គឺជាស្នូល ដឹកនាំ ជាសសរទ្រូងដ៏រឹងមាំរបស់គណបក្សប្រជាជនកម្ពុជា និងជាអគ្គមគ្គុទ្ទេសក៍ដ៏ឆ្នើមនៃប្រជាជនកម្ពុជា៕