ជប៉ុន៖ គណៈកម្មការប៉ារ៉ាឡាំពិកអន្តរជាតិ (IPC) បានឱ្យដឹងនៅថ្ងៃទី២៨ ខែសីហាម្សិលមិញនេះថា អត្តពលិកមានពិការភាពរបស់អាហ្វហ្គានីស្ថាន ២នាក់ បានបង្ហាញខ្លួនក្នុងព្រឹត្តិការណ៍នេះ និងត្រៀមប្រកួតប្រជែង ក្រោយជម្លៀសខ្លួនចេញពីប្រទេសកំណើតរបស់ខ្លួនកាលពីពេលថ្មីៗ។

អត្តពលិកជាជនមានពិការភាព ២រូបគឺ កីឡាករ Hossain Rasouli និងកីឡាការិនី Zakia Khudadadi បានភៀសខ្លួនចេញពីប្រទេសអាហ្វហ្គានីស្ថានកាលពីសប្តាហ៍មុន និងបន្តដំណើរទៅកាន់ប្រទេសបារាំង ដើម្បីគេចចេញពីស្ថានភាពដែលកំពុងយ៉ាប់យ៉ឺននៅប្រទេសខ្លួន ក្រោយការចូលកាន់តំណែងពីក្រុមសកម្មប្រយុទ្ធឧទ្ទាម តាលីបង់។

គួរឱ្យដឹងថា មុននឹងមកដល់ប្រទេសជប៉ុន នាទីក្រុងតូក្យូសម្រាប់ការប្រកួតប៉ារ៉ាឡាំពិកនេះ អត្តពលិកទាំងពីរបានស្នាក់នៅក្នុងមជ្ឈមណ្ឌលហ្វឹកហាត់របស់ក្រសួងកីឡាប្រទេសបារាំងមួយសប្តាហ៍ផងដែរ។ 

កីឡាការិនី Zakia Khudadadi នឹងត្រូវប្រកួតលើប្រភេទវិញ្ញសារកីឡាតេក្វាន់ដូ K-44 ទំងន់ ៤៩គីឡូក្រាម នាថ្ងៃទី២ ខែកញ្ញា ហើយកីឡាករ Hossain Rasouli នឹងត្រូវប្រកួតលើប្រភេទវិញ្ញសាររត់ចំងាយ ៤០០ម៉ែត្រ T47 នាថ្ងៃទី០៣ ខែកញ្ញា។

ការប្រកាសរបស់គណៈកម្មការប៉ារ៉ាឡាំពិកអន្តរជាតិ (IPC)នេះបានបង្កការភ្ញាក់ផ្អើលខ្លាំងសម្រាប់មជ្ឈដ្ឋានអន្តរជាតិ ត្បិតដំបូងឡើយគេដឹងថាអត្តពលិកទាំងពីរនាក់នេះ ទំនងជាត្រូវជាប់គាំង និងមិនអាចចាកចេញពីប្រទេសបានឡើយក្រោយការចូលកាន់អំណាចរបស់ក្រុមសកម្មប្រយុទ្ធតាលីបង់ ហើយក្រោយពីទទួលដំណឹងថាអត្តពលិកទាំងពីររូបនេះបានចាកចេញពីប្រទេសអាហ្វហ្គានីស្ថានដោយសុវត្ថិភាព គណៈកម្មការប្រកួតក៏មិនទាន់បញ្ជាក់ពីការប្រកួតរបស់ពួកគេដែរ ដោយលើកឡើងពីហេតុផលសុវត្ថិភាព និងភាពកក់ក្តៅសម្រាប់អត្តពលិក តែក្រោយមកក៏បានប្រកាសពីការចូលរួមប្រកួតប្រជែងរបស់អត្តពលិកទាំងពីរនេះវិញ៕