ភ្នំពេញ៖ នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានកោតសរសើរ និងថ្លែងអំំណរគុណដល់កម្មករនៃគម្រោងរំដោះទឹក និងពង្វាងទឹកចេញពីរាជធានីភ្នំពេញ និងតំបន់រណប ដោយថាគម្រោងនេះមិនត្រឹមតែជួយការពាររាជធានីភ្នំពេញពីទឹកជំនន់នោះទេ វាថែមទាំងជួយរក្សាទឹកទុកឱ្យមានខួបប្រាំងវស្សាផងដែរ។

ថ្លែងក្នុងពេលចុះពិនិត្យវឌ្ឍនភាពគម្រោងប្រព័ន្ធរំដោះទឹកជំនន់ចេញពីរាជធានីភ្នំពេញ និងជួបសំណេះសំណាលជាមួយក្រុមការងារសាងសង់ព្រឹកថ្ងៃទី១៤ ខែមិថុនា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានថ្លែងអំណរគុណដល់ក្រសួង និងអាជ្ញាធរពាក់ព័ន្ធដែលបានចូលរួមក្នុងការធ្វើឱ្យគម្រោងនេះចេញជារូបរាងបាន។ ក្នុងនោះផងដែរសម្ដេចបានអរគុណដល់កម្មករនៃគម្រោងនេះដោយថា

សម្ដេចថា៖ «អ្វីដែលយើងធ្វើនេះគឺប្រព័ន្ធរំដោះទឹក ទី២គឺប្រព័ន្ធស្រោចស្រពធារាសាស្ត្រ ដែលយើងធានាទឹកខួបប្រាំងខួបវស្សាសម្រាប់ប្រជាពលរដ្ឋយើងប៉ុន្មានខេត្តនេះរាប់ម៉ឺនហិតា ប្រមាណ៥០ម៉ឺនហិតាដែលអាចទទួលផលបាន»។

សម្ដេចធិបតីឱ្យដឹងថាគម្រោងរំដោះទឹកជំនន់ក្នុងរាជធានីភ្នំពេញទាំងក្នុងរាជធានី និងប្រព័ន្ធរំដោះទឹកនេះចំណាយថវិកាជាង៤០០លានដុល្លារអាមេរិក។

គម្រោងប្រព័ន្ធដោះទឹក និងពង្វាងទឹកចេញពីរាជធានីភ្នំពេញ និងតំបន់រណបត្រូវអនុវត្តជា បីជំហានបច្ចុប្បន្ន ក្រសួងធនធានទឹក និងឧតុនិយម កំពុងអនុវត្តជំហានទី១ និងទី២ ដោយចាប់ផ្តើមពីខែធ្នូ ឆ្នាំ២០២៣ ហើយគ្រោងបញ្ចប់នៅដំណាច់ខែសីហា ឆ្នាំ២០២៤។ ការងារសំខាន់ៗរបស់គម្រោងរួមមាន៖ ស្តារស្ទឹង និងប្រឡាយចំនួន ១០ខ្សែ ប្រវែងប្រមាណ ២៦០គីឡូម៉ែត្រ៕