បន្ទាយមានជ័យ​ ៖​ អភិបាលខេត្តបន្ទាយមានជ័យ ដាក់ចេញទិសដៅទៅដល់កងកម្លាំងគ្រប់​អង្គភាពទាំងអស់ បន្តពង្រឹងការគ្រប់គ្រងអនុវត្តគោលនយោបាយភូមិ-ឃុំមានសុវត្ថិភាព បញ្ជ្រាបទៅដល់មូលដ្ឋានអំពីគ្រឿងញៀន​,​ពង្រឹងការផ្តល់សេវាព្យាបាលកាយសម្បទា​ និងអប់រំ,​ ពង្រឹងការដាក់វិធានការឱ្យបានច្បាស់លាស់,ទៅតាមផែនការថ្នាក់ក្រោមជាតិ,​ ពង្រឹងប្រព័ន្ធច្បាប់ដើម្បីការពារជំហរចូលតាមព្រំដែនពីប្រទេសមួយទៅប្រទេសមួយ​ និងពង្រឹងទំនាក់ទំនងខេត្តជាប់ព្រំដែន​ និងមានធានការផ្សព្វផ្សាយដល់ពលករឆ្លងដែនតាមរោងចក្រនិងសហគ្រាស​ អំពីផលប៉ះពាល់នៃគ្រឿងញៀន។ 

លោក​ អ៊ុំ​ រាត្រី​ អភិបាលខេត្តបន្ទាយមានជ័យ​ បានដាក់ចេញវិធានការទាំងនេះ​ ធ្វេីឡេីងនៅក្នុងកិច្ចប្រជុំ​ ត្រួតពិនិត្យគណៈកម្មាធិការ ត្រួតពិនិត្យគ្រឿងញៀន​ ដោយមានការអញ្ជេីញចូលរួមពី អភិបាលរងខេត្ត​ មេបញ្ជការកងកម្លាំងទាំងបី​ មន្ទីរ​ ស្ថាប័នពាក់ព័ន្ធ​ អភិបាលក្រុង-ស្រុក​ ប្រារព្ធនៅសាលប្រជុំ​ ខ​ សាលាខេត្តបន្ទាយមានជ័យ​ នៅរសៀលថ្ងៃសុក្រ​ ទី១៧​ ខែឧសភា​ ឆ្នាំ២០២៤​។ 

ព្រមជាមួយគ្នានោះលោកក៏បានជំរុញបន្ថែមទៅដល់ក្រុមការងារ​គណៈកម្មាធិការ ត្រួតពិនិត្យគ្រឿងញៀន​ ត្រូវបន្តចូលរួមផ្សព្វផ្សាយអំពីផលប៉ះពាល់នៃគ្រឿងញៀនទៅដល់គ្រប់បណ្ដាសាលារៀនទូទាំងខេត្ត​ ឱ្យបានទូលំទូលាយបន្ថែមទៀត។ មួយវិញទៀតឯកឧត្តម​ ក៏បានដាក់ចេញនូវបទបញ្ជាយ៉ាងម៉ឺងម៉ាត់ទៅដល់កងកម្លាំងដែលឈរជើងតាមបន្ទាត់ព្រំដែន​ ត្រូវបន្តរួមសហការគ្នា ជាមួយនឹងភាគីថៃ​ រួមគ្នាទប់ស្កាត់ការរត់ពន្ធគ្រឿងញៀន តាមព្រំដែនឱ្យបានម៉ឺងម៉ាត​ អនុវត្តតាមអនុសាសន៍ណែនាំរបស់ប្រមុខរាជរដ្ឋាភិបាលកម្ពុជា​ ក្នុងការប្រយុទ្ធប្រឆាំងគ្រឿងញៀន គឺត្រូវអនុវត្តនូវ “យុទ្ធសាស្ត្រសម្អាតចកដើម្បីឱ្យទឹកថ្លាពេញផ្ទៃបឹង” ក្នុងន័យរួមគ្នាប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ ដើម្បីបង្ហាញឆន្ទៈមោះមុត និងទស្សនវិស័យច្បាស់លាស់ របស់រាជរដ្ឋាភិបាល ក្នុងការកែប្រែកម្ពុជាក្លាយជាប្រទេសមួយដែលគ្រឿងញៀនលែងជាឧបសគ្គ និងជាបញ្ហារបស់សង្គមជាតិ៕​