ភ្នំពេញ៖ ប្រធានព្រឹទ្ធសភា សម្ដេចតេជោ ហ៊ុន សែន បានថ្លែងថាដោយប្រៀបធៀបព្រែកជីកហ្វូណនតេជោគឺជា «ឯករាជ្យរបស់កម្ពុជា» ដែលមិនត្រូវបានចំណុះដោយកត្តាធម្មជាតិកើតឡើងណាមួយ ឬនយោបាយរបស់ប្រទេសដទៃនោះទេ។

សម្ដេចថ្លែងបែបនេះក្នុងសារពិសេសថ្ងៃទី១៦ ខែឧសភា ឆ្នា២០២៤នេះ ដោយស្នើដល់ប្រជាជនខ្មែរគ្រប់រូបមើលឱ្យហួសពីផលចំណេញខាងសេដ្ឋកិច្ច ឱ្យឈានដល់ឯករាជ្យខាងនយោបាយនៃការដឹកជញ្ជូន។

សម្ដេចថា៖ «ខ្ញុំត្រូវការឯករាជ្យឱ្យប្រជាជនកម្ពុជា មានសេរីភាពក្នុងការដឹកជញ្ជូនធ្វើអាជីវកម្មក្នុងប្រទេស និងទំនាក់ទំនងអន្តរជាតិតាមព្រែកជីកហ្វូណនតេជោ»។

បើតាមសម្ដេចតេជោព្រែកជីកហ្វូណនតេជោមិនត្រឹមតែជាផ្លូវទឹកដ៏សំខាន់នោះទេ វាអាចបង្កើតបាននូវប្រព័ន្ធស្រោចស្របនៅទិសនីរតី និងភាពបៃតងនៅទិសនីរតីរបស់កម្ពុជា តាមរយៈការកើនឡើងនៃការដាំដុះ ការដាំដើមឈើ។ ក្រៅពីនេះ ក្រោយមានព្រែកជីកនេះហើយ វិស័យទេសចរណ៍របស់ប្រទេសកម្ពុជា នៅទិសនីរតី ក៏នឹងមានការរីកចម្រើន ដូចការ ប្រសិទ្ធនាមថា តារារះនៅទិសនីរតីផងដែរ។ សម្ដេចតេជោ ហ៊ុន សែន ក៏បានបញ្ជាក់ថា តាមរយៈគម្រោងព្រែកជីកហ្វូណនតេជោនេះ ក៏នឹងជួយទប់ស្កាត់បញ្ហាទឹកជំនន់នៅរដូវវស្សា ក្នុងប្រទេសកម្ពុជាផង និងបណ្ដាប្រទេសជិតខាងផងដែរ។ហើយសម្តេចតេជោ ក៏សង្កត់ធ្ងន់ថា កម្ពុជា មិនល្ងង់ រហូតដល់ទៅទាញទឹកប្រៃ មកបំផ្លាញទឹកសាបខ្លួនឯងនោះទេ៕