ជប៉ុន៖ ក្រុមហ៊ុនផលិតឱសថ Takeda និងក្រសួងសុខាភិបាលជប៉ុន បានចេញមកប្រកាសរួមគ្នានាថ្ងៃព្រហស្បតិ៍ ទី២៦ ខែសីហានេះថា វ៉ាក់សាំងបង្ការកូវីដ-១៩ ចំនួនជាង ១,៦៣លានដូស ប្រភេទ Moderna នឹងត្រូវអាជ្ញាធរបោះបង់ចោល និងបញ្ឈប់ការគ្រោងប្រើប្រាស់ បន្ទាប់ពីរកឃើញមានកំហុសឆ្គងមួយចំនួនទៅលើវ៉ាក់សាំងជាង ១,៦លានដូសនេះ។

ក្រុមហ៊ុន Takeda ដែលទទួលបន្ទុកទៅលើការលក់ និងចែកចាយវ៉ាក់សាំងប្រភេទ Moderna ក្នុងប្រទេសជប៉ុនបានបញ្ជាក់ថា ក្រុមហ៊ុនទើបតែទទួលបាននូវព័ត៌មានពីរោងចក្រផលិតថា មានសារធាតុមិនប្រក្រតីមួយចំនួនត្រូវបានរកឃើញនៅក្នុងវ៉ាក់សាំងដែលបានផលិតចុងក្រោយនេះ។ យ៉ាងណាក៏ដោយ វាជាសំណាងល្អដែលវ៉ាក់សាំងនេះនៅមិនទាន់បានបញ្ចេញពីឃ្លាំងស្តុកដើម្បីចែកចាយសម្រាប់ការប្រើប្រាស់នៅឡើយទេ ហើយក្រោយពីមានការពិភាក្សាជាមួយក្រសួងសុខាភិបាលរួចមក យើងបានសម្រេចចិត្តបញ្ឈប់លើការប្រើប្រាស់វ៉ាក់សាំងក្នុងស្តុកដែលនៅសល់ចាប់ពីថ្ងៃទី២៦ ខែសីហានេះតទៅ។

ក្រុមហ៊ុនខាងលើនេះក៏បានបញ្ជាក់ថា ភាគីជប៉ុនបានជូនដំណឹងទៅកាន់ក្រុមហ៊ុន Moderna រួចរាល់ហើយ ដោយបានស្នើឱ្យមានការស៊ើបអង្កេតបន្ទាន់មួយផងដែរ ខណៈភាគីក្រុមហ៊ុន Moderna វិញនៅមានទាន់មានការអធិប្បាយណាមួយពាក់ព័ន្ធនឹងបញ្ហានេះនៅឡើយ។

ក្រសួងសុខាភិបាលជប៉ុនបានអះអាងថា ក្រសួងនឹងធ្វើការរួមគ្នាជាមួយក្រុមហ៊ុន Takeda ដើម្បីធានាថាបញ្ហានេះនឹងមិនជះផលប៉ះពាល់ទៅលើកម្មវិធីវ៉ាក់សាំងរបស់រដ្ឋាភិបាលឡើយ ក្រោយពីយុទ្ធនាការវ៉ាក់សាំងថ្នាក់ជាតិកំពុងដំណើរការ បន្ទាប់ពីមានភាពយឺតយ៉ាវក្នុងការចាប់ផ្តើម។ គិតមកទល់បច្ចុប្បន្ននេះ ជប៉ុនបានផ្តាល់វ៉ាក់់សាំងជូនប្រជាជនខ្លួនពេញលេញចំនួនជាង ៤៣ភាគរយទៅហើយ ប៉ុន្តែយ៉ាងណាក្តី នៅពេលនេះជប៉ុនក៏មិនទាន់មានភាពធូរស្រាលនៅឡើយ ត្បិតវីរុសកូវីដ-១៩ ប្រភេទថ្មី Delta (ដែលតា) នៅតែបន្តគំរាមកំហែង និងរាតត្បាតក្នុងប្រទេសនៅឡើយ៕