ភ្នំពេញ៖ ប្រធានព្រឹទ្ធសភានិងជាប្រធានគណបក្សប្រជាជនកម្ពុជាសម្ដេចតេជោ ហ៊ុន សែន បានប្រកាសស្វាគមន៍លោក ម៉ម អស្សនី ដើម្បីចូលរួមគណបក្សប្រជាជនកម្ពុជា។
ការស្វាគមន៍នេះគឺបន្ទាប់ពីលោក អស្សនី បានសុំទោសនិងបានបង្ហាញពីឆន្ទៈក្នុងការចូលរួមជាមួយនឹងគណបក្សដ៏មានអំណាចនៅកម្ពុជាមួយនេះ។
លោក ម៉ម អស្សនី គឺជាអ្នកដែលបញ្ចេញយោបល់និងវាយប្រហារទៅលើគណបក្សប្រជាជនកម្ពុជានិងរដ្ឋាភិបាលកម្ពុជាជាខ្លាំងបន្ទាប់ពីលោកទៅនៅបរទេស។
ក្នុងសារសំឡេង ៣នាទី៣០វិនាទី សម្ដេចតេជោ ហ៊ុន សែន យល់ឃើញថាការវាយប្រហាររបស់លោក អស្សនី ទៅលើគណបក្សប្រជាជនកាលពីកន្លងទៅគឺកើតឡើងតាមរយៈការញុះញង់និងខ្សែញាក់របស់ក្រុមរត់ចោលស្រុកតែប៉ុណ្ណោះ។
សម្ដេចតេជោបានប្រកាសស្វាគមន៍លោក ម៉ម អស្សនី ត្រឡប់មកកាន់ប្រទេសកម្ពុជាវិញនិងចូលរួមជាមួយនឹងគណបក្សប្រជាជនកម្ពុជាផងដែរ។
សម្ដេចតេជោបានលើកឡើងថាគ្រប់អ្នកដែលប្រឆាំងសម្ដេចទាំងអស់គឺសម្ដេចអាចលើកលែងទោសឲ្យបាន លើកលែងតែមនុស្សម្នាក់ប៉ុណ្ណោះដែលទំនងសំដៅទៅលើលោក សម រង្ស៊ី ដែលសម្ដេចថាមិនអាចលើកលែងទោសឲ្យបានជារៀងរហូត៕
