ភ្នំពេញ៖ នាយករដ្ឋមន្ត្រី សម្ដេចធិបតី ហ៊ុន ម៉ាណែត បានជំរុញដល់ការយកចិត្តទុកដាក់បន្ថែមដល់ការពង្រឹងគុណភាព និងបរិមាណសិស្សដែលត្រូវបណ្ដុះបណ្ដាលក្នុងសាលាជាតិផែនការ និងស្ថិតិ ដើម្បីបំពេញនូវកង្វះខាតធនធានមនុស្សដែលកំពុងមានតម្រូវការ។

ថ្លែងក្នុងពិធីបិទសន្និបាតការងារឆ្នាំ២០២៣ ក្រសួងផែនការ ព្រឹកថ្ងៃអង្គារ៍ ទី៩ ខែមេសា ឆ្នាំ២០២៤ សម្ដេចធិបតី ហ៊ុន ម៉ាណែត បានថ្លែងថាក្នុងពេលដែលកម្ពុជាកំពុងវិវត្តន៍នូវកម្មវិធីកែទម្រង់សាធារណៈក្នុងកម្មវិធីបញ្ចកោណដំណាក់កាលទី១ក្នុងការជំរុញការបណ្ដុះបណ្ដាលវគ្គបណ្ដុះបណ្ដាលទាក់ទងនឹងវិស័យផែនការស្ថិតិវិទ្យាសាស្ត្រ សាលាជាតិផែនការ និងស្ថិតិបានដើរតួនាទីបណ្ដុះបណ្ដាលដ៏មានសារៈសំខាន់ក្នុងការងារនេះ។

សម្ដេចថា៖ «សាលាជាតិផែនការស្ថិតិក៏ជាអទិភាពមួយដែលក្រសួងត្រូវគិតគូរទាំងបរិមាណ និងគុណភាព។ គុណភាពសំខាន់ ការរើសក្របខណ្ឌបំពេញបន្ថែមការបំប៉នបន្ថែមនិងបង្កើនគុណវុឌ្ឍបន្ថែមសម្រាប់មន្ត្រីដែលធ្វើការក្នុងទិន្នន័យនេះគឺសំខាន់ណាស់! ដែលចាំបាច់»។

សម្ដេចធិបតីបានលើកទឹកចិត្តគាំទ្រដល់ការដាក់ទិសដៅរបស់ក្រសួងផែនការក្នុងការពង្រឹងនូវសាលាជាតិផែនការ និងស្ថិតិនេះ ដែលនឹងជួយផលិតនូវធនធានមនុស្សសម្រាប់ជួយដល់ក្រសួងផែនការផ្ទាល់ ក៏ដូចជាក្រសួងផ្សេងទៀត ព្រោះទៅថ្ងៃខាងមុខការរៀបចំផែនការសន្ទស្សត្រូវមានផែនការរួមតែមួយ។

រដ្ឋមន្ត្រីក្រសួងផែនការលោក ប៊ិន ត្រឈៃ បានឱ្យដឹងថាសាលាជាតិផែនការ និងស្ថិតិ មានសិទ្ធិបណ្ដុះបណ្ដាលដល់ថ្នាក់ឧត្តមក្នុងវិស័យផែនការ និងស្ថិតិលើជំនាញផែនការអនុវត្តន៍ ស្ថិតិអនុវត្តន៍ ស្ថិតិប្រជាសាស្ត្រ និងការតាមដានត្រួតពិនិត្យវាយតម្លៃ។ បច្ចុប្បន្នសិស្សកំពុងសិក្សានៅសាលានេះមាន ៥៨៣នាក់ ស្រី១៣២នាក់ ក្នុងនោះមន្ត្រីរាជការ ៤៥២នាក់៕