ភ្នំពេញ: រដ្ឋបាលរាជធានីភ្នំពេញបានសម្រេចបន្តការរឹតបន្តឹងនៅក្នុងរាជធានី រយៈពេល ២សប្តាហ៍ទៀត ការហាមឃាត់ការលក់គ្រឿងស្រវឹង និងការជួបជុំមនុស្សលើសពី ១៥នាក់ ព្រមទាំងការបិទអាជីវកម្មដែលមានហានិភ័យខ្ពស់នឹងត្រូវផុតកំណត់នៅថ្ងៃព្រហស្បតិ៍នេះ តែទោះជាយ៉ាងណា រដ្ឋបាលរាជធានីបានប្រកាសបន្តការហាមឃាត់រយៈពេលពីរសប្តាហ៍ទៀត។
ការបន្តការរឹតបន្តឹងនេះ ខណៈរាជធានីភ្នំពេញនៅតែបន្តកើនឡើងនៃចំនួន Covid-19 ជាពិសេស Delta ។ ភ្នំពេញគឺស្ថិតក្នុងចំណាត់ថ្នាក់ខ្ពស់ជាងគេក្នុងចំណោមខេត្តនិងរាជធានីចំនួន ២៣ ដែលមានចំនួនករណី Delta ។ គិតត្រឹមថ្ងៃអង្គារនេះ ក្រសួងសុខាភិបាលបានប្រកាសថា ទីក្រុងភ្នំពេញបានរកឃើញករណីវីរុស Delta ចំនួន ៣៧៥ ករណី។
រដ្ឋបាលរាជធានីភ្នំពេញក៏បានក្រើនរំលឹកដល់សាធារណជនផងដែរថា អាជីវកម្មដែលមានហានិភ័យខ្ពស់នៅតែបន្តបិទដែលមានដូចជា សាលារៀន អាជីវកម្មកម្សាន្ត ខារ៉ាអូខេ បារឌីស្កូ សួនច្បារ កាស៊ីណូ មណីយដ្ឋានសារមន្ទីរ សួនកុមារនិងសួនកម្សាន្ត ស្ប៉ាម៉ាស្សា រោងកុនល្ខោនសិល្បៈ កន្លែងហាត់ប្រាណ និងមជ្ឈមណ្ឌលកីឡា៕