រាជធានីភ្នំពេញ៖ នៅថ្ងៃទី០២ ខែមេសានេះ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ជាសមាជិករដ្ឋសភានីតិកាលទី៧ និងជាតំណាងរាស្រ្តមណ្ឌលខេត្តកណ្ដាល បានដាក់លិខិតមួយច្បាប់ជូនទៅសម្តេចមហារដ្ឋសភាធិការធិបតី ប្រធានរដ្ឋសភា ដើម្បីស្នើសុំលាលែងចេញពីតំណែងសមាជិករដ្ឋសភា នីតិកាលទី៧។

នៅក្នុងខ្លឹមសារលិខិតនេះ សម្តេចតេជោ  ហ៊៊ុន សែន បានជម្រាបជូនទៅកាន់សម្តេចមហារដ្ឋសភាធិការធិបតី ឃួន សុដារី អំពីមូលហេតុនៃការលាឈប់នេះ ដោយលោកត្រូវមានភារកិច្ចបំពេញតួនាទីថ្មីនៅក្នុងព្រឹទ្ធសភា នីតិកាលទី៥។ ក្នុងលិខិតដដែលនេះក៏ទទួលបានការយល់ព្រមលើសំណើលាឈប់ពីតួនាទីនេះពីសំណាក់សម្តេចប្រធានរដ្ឋសភារួចរាល់ផងដែរ។

គួរបញ្ជាក់ថា ព្រឹទ្ធសភានៃព្រះរាជាណាចក្រកម្ពុជា នឹងប្រារព្ធពិធីបើកសម័យប្រជុំដំបូង នីតិកាលទី៥ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាថ្ងៃទី០៣ ខែមេសា ឆ្នាំ២០២៤ វេលាម៉ោង ៨ព្រឹក នៅវិមានព្រឹទ្ធសភា ខណ្ឌចំការមន។

សូមអានខ្លឹមសារលិខិតលាឈប់ពីសមាជិករដ្ឋសភារបស់សម្តេចអគ្គមហាសេនាបតីតេជោ ហ៊ុន សែន ដូចមានភ្ជាប់ខាងក្រោម៖