ពិភពលោក៖ ធនាគារអភិវឌ្ឍន៍ថ្មី (NDB) ដែលបង្កើតឡើងដោយក្រុមប្រទេសដែលមានសេដ្ឋកិច្ចកំពុងរីកចម្រើន (BRICS) មានគោលបំណងក្នុងការផ្តល់ប្រាក់កម្ចីចេញប្រហែល ៥ពាន់លានដុល្លារក្នុងឆ្នាំនេះ។ នេះបើតាមអនុប្រធានធនាគារនេះគឺលោក Zhou Qiangwu បានឱ្យដឹងនៅថ្ងៃទី២៧ ខែមីនា។ 

លោក Zhou Qiangwu បានថ្លែងប្រាប់ក្រុមអ្នកសារព័ត៌មាននៅក្រៅវេទិកានៃកិច្ចប្រជុំប្រចាំឆ្នាំបូអាវ (Boao) ថា៖ "អំឡុងពេលនៃការរាតត្បាតជាសកលនៃវីរុសកូវីដ-១៩ អាជីវកម្មជាច្រើនបានរងផលប៉ះពាល់ ប៉ុន្តែបច្ចុប្បន្ននេះគ្រប់យ៉ាងកំពុងវិលមករកភាពល្អប្រសើរឡើងវិញហើយ"។ លោក Zhou មិនបាននិយាយលម្អិតច្រើនអំពីដំណើរការនៃធនាគារនេះទេ ប៉ុន្តែលោកគ្រាន់តែបង្ហើបថាចិន និងឥណ្ឌាគឺជាប្រទេសដែលទទួលបានការវិនិយោគច្រើនជាងគេ បើប្រៀបនឹងប្រទេសជាសមាជិកដទៃទៀត។ 

គួរបញ្ជាក់ថា ធនាគារអភិវឌ្ឍន៍ថ្មី (The New Development Bank) ឬហៅកាត់ថា NDB ត្រូវបានបង្កើតឡើងក្នុងឆ្នាំ២០១៥ ដោយប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ដែលត្រូវបានគេស្គាល់ថាជាប្រទេស BRICS ហើយបច្ចុប្បន្ននេះមានទីស្នាក់ការកណ្ដាលរបស់ខ្លួននៅទីក្រុងសៀងហៃ ប្រទេសចិន។ 

និយាយដោយឡែកពីផែនការបញ្ចេញប្រាក់កម្ចីរបស់ NDB លោក Zhou ក៏បានឆ្លៀតបង្ហើបផងដែរដោយលោក​រំពឹង​ថា សេដ្ឋកិច្ច​របស់​ប្រទេស​ចិន​នឹង​មាន​កំណើន​ប្រហែល ៥ភាគរយ​នៅ​ឆ្នាំ​នេះ ស្រប​តាម​គោលដៅ​ដែលបានដាក់ចេញរបស់​រដ្ឋាភិបាល៕