រុស្សី៖ រុស្ស៊ីបានបញ្ជាឱ្យឃុំខ្លួនបុរសចំនួន ៤នាក់ដោយចោទប្រកាន់ពីបទ "ភេរវកម្ម" បន្ទាប់ពីបុគ្គលទាំងបួននាក់ខាងលើត្រូវបានសមត្ថកិច្ចចាប់ខ្លួន  ក្រោយហេតុការណ៍សម្លាប់រង្គាលមួយនៅឯសាលប្រគុំតន្ត្រីនៅទីក្រុងមូស្គូ ដែលតួលេខបឋមមានមនុស្សចំនួន ១៣៧នាក់បានស្លាប់ ដោយតួលេខនេះត្រូវគេរំពឹងថានឹងអាចកើនឡើងបន្ថែមទៀត ត្បិតចំនួនមនុស្សដែលកំពុងទទួលការសង្គ្រោះបន្ទាន់មានប្រមាណ ១០០នាក់ផ្សេងទៀត។ គួរបញ្ជាក់ថា បើតាមបទចោទប្រកាន់ខាងលើ បុរសទាំង ៤នាក់អាចប្រឈមនឹងការជាប់ពន្ធនាគារអស់មួយជីវិត។ 

នៅក្នុងសវនាការដែលបន្តដំណើរការជាបន្តបន្ទាប់នាតុលាការទីក្រុងមូស្គូនៅព្រឹកថ្ងៃចន្ទនេះ ជនត្រូវចោទទាំងបួននាក់ដែលគេសង្កេតឃើញមានស្នាមជាំ និងរបួសនៅលើផ្ទៃមុខរបស់ពួកគេ ត្រូវបានកងកម្លាំងនាំចូលទៅក្នុងតុលាការដោយឆ្លងកាត់វត្តមានអ្នកសារព័ត៌មានរាប់សិបនាក់ដែលប្រមូលផ្តុំគ្នានៅនឹងមុខតុលាការតំ​បន់ Basmanny រដ្ឋធានីម៉ូស្គូ។ 

ក្នុងដំណើរការសវនាការនេះ គេសង្កេតឃើញកងកម្លាំងសន្តិសុខបាននាំយកបុរសទាំងបួននាក់ ម្នាក់ម្តងៗចូលទៅក្នុងបន្ទប់សវនាការជាមួយស្ថានភាពសុខភាពដែលគួរឱ្យព្រួយបារម្ភ បន្ទាប់ពីមានរបាយការណ៍ និងវីដេអូបែកធ្លាយនៅលើបណ្តាញសង្គមរុស្ស៊ីអំពីការសួរចម្លើយដ៏ហិង្សា ក្រោយពេលពួកគេត្រូវបានសមត្ថកិច្ចចាប់ខ្លួនកាលពីថ្ងៃសៅរ៍។ 

គួរឱ្យដឹងថា ហេតុការណ៍នៃការវាយប្រហារដ៏សាហាវឃោរឃៅ និងគួរឱ្យភ្ញាក់ផ្អើលទូទាំងពិភពលោកនេះ ត្រូវបានក្រុមភេរវកម្មរដ្ឋអ៊ីស្លាម (ISIS) អះអាងថាជាស្នាដៃរបស់ខ្លួន ក៏ប៉ុន្តែមន្រ្តីនៃរដ្ឋាភិបាលរុស្សីពុំបានធ្វើការអធិប្បាយណាមួយពាក់ព័ន្ធនឹងក្រុមនេះនៅឡើយទេ។ ជាក់ស្ដែង នៅក្នុងសុន្ទរកថាជាសាធារណៈលើកដំបូង និងតែមួយគត់របស់លោកប្រធានាធិបតី វ្ល៉ាឌីមៀ ពូទីន បានដាក់ការសង្ស័យថាសកម្មភាពនៃការវាយប្រហារនេះមានជាប់ពាក់ព័ន្ធនឹងរដ្ឋាភិបាលអ៊ុយក្រែន ដោយលោកបានអះអាងថាបុគ្គលទាំងបួននាក់ខាងលើនេះត្រូវបានចាប់ខ្លួន អំឡុងពេលដែលពួកគេបានព្យាយាមគេចខ្លួនចូលទៅកាន់ទឹកដីអ៊៊ុយក្រែន៕