ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសថា នឹងបើកប្រាក់ខែដល់កម្មករនិយោជិតក្រុមហ៊ុនY &W Garment ចាប់ពីថ្ងៃសៅរ៍ ទី២៣ ខែមីនា ឆ្នាំ២០២៤ នេះតទៅ។

បើតាមក្រសួងការងារ ប្រាក់ខែដែលបើកជូនដល់កម្មករនិយោជិត គឺបានមកពីការលក់ដេញថ្លៃទ្រព្យសម្បត្តិ និងសម្ភាររបស់ក្រុមហ៊ុនដែលបានក្ស័យធន តាមដីកាសម្រេចរឹបអូសរបស់សាលាដំបូងរាជធានីភ្នំពេញ ក្រោយពីថៅកែរត់ចោលមិនព្រមទូទាត់ប្រាក់ឈ្មួលដល់កម្មករនិយោជិត។

ក្រសួងការងារបញ្ជាក់ថា កម្មករនិយោជិត អាចអញ្ជើញទៅបើកលុយនៅសាលាខណ្ឌដង្កោ ដែលមានអាសយដ្ឋាន ផ្លូវ២១៧ ភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ចាប់ពីម៉ោង ៨ព្រឹក ថ្ងៃសៅរ៍ ទី២៣ ខែមីនា ឆ្នាំ២០២៤ នេះតទៅ តាមបញ្ជីឈ្មោះ និងលេខរៀងដែលក្រសួងនឹងបិតនៅសាលាខណ្ឌដង្កោ នៅព្រឹកថ្ងៃទី២៣ ខែមីនា មុនបើកផ្តល់។

កម្មករនិយោជិត ត្រូវយកប័ណ្ណសម្គាល់ខ្លួនកម្មករនិយោជិត (ច្បាប់ដើម) ឬកិច្ចសន្យាការងារ និងសៀវភៅការងារកម្មករ និយោជិត ឬប័ណ្ណសមាជិក ប.ស.ស. ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន ប័ណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ៕