អន្តរជាតិ៖ ក្រុមសកម្មប្រយុទ្ធហាម៉ាសបានដាក់ចេញនូវគម្រោងផែនការស្ដីពីបទឈប់បាញ់នៅក្នុងតំបន់ហ្គាហ្សា ដើម្បីប្រគល់ឱ្យអន្តរការីសម្របសម្រួលពិនិត្យ និងពិភាក្សា ដែលដំណាក់កាលដំបូងបង្អស់នៃបទឈប់បាញ់នេះក៏នឹងរួមបញ្ចូលនូវការដោះលែងស្ត្រី កុមារ, ជនចាស់ជរា និងចំណាប់ខ្មាំងដែលកំពុងមានជម្ងឺរបស់អ៊ីស្រាអែល ជាថ្នូរមកវិញនូវការដោះលែងអ្នកទោសជនជាតិប៉ាឡេស្ទីនប្រមាណជា ៧០០ ទៅ ១,០០០នាក់ដែលកំពុងជាប់ពន្ធនាគារ។

ក្នុងចំណោមអ្នកទោសប៉ាឡេស្ទីនដែលនឹងត្រូវដោះលែងនេះ ត្រូវបានគេដឹងថាមានប្រមាណជា ១០០នាក់ត្រូវបានកាត់ទោសឱ្យជាប់់ពន្ធនាគារអស់មួយជីវិតនៅក្នុងពន្ធនាគាររបស់អ៊ីស្រាអែល។ នេះបើតាមគម្រោងដែលសារព័ត៌មាន Reuter ទទួលបាន។ 

នៅក្នុងសំណើដែលបានផ្តល់ជាលើកដំបូងនេះ ក្រុមហាម៉ាសក៏បានបញ្ជាក់ថា ខ្លួននឹងឯកភាពលើកាលបរិច្ឆេទសម្រាប់បទឈប់បាញ់ជាអចិន្ត្រៃយ៍ បន្ទាប់ពីការដោះដូរចំណាប់ខ្មាំងនិងអ្នកទោសជាលើកដំបូងនេះបានទទួលជោគជ័យ និងអនុវត្តចប់សព្វគ្រប់។

នៅក្នុងសំណើនេះដែរ ក្រុមហាម៉ាសក៏បានបញ្ជាក់អំពីពេលវេលាកំណត់ជាក់លាក់សម្រាប់អ៊ីស្រាអែលក្នុងការដកទ័ពចេញពីតំបន់ហ្គាហ្សា ក្រោយពីផែនការបទឈប់បាញ់ដំណាក់កាលដំបូងនេះធ្វើឡើង។ ក្រុមសកម្មប្រយុទ្ធប៉ាឡេស្ទីននេះក៏បានបញ្ជាក់ផងដែរថា អ្នកជាប់ឃុំទាំងអស់របស់ភាគីទាំងសងខាងនឹងត្រូវបានដោះលែងនៅក្នុងដំណាក់កាលទីពីរនៃផែនការអនុវត្តបទឈប់បាញ់នេះ៕