*ភ្នំពេញ៖* នៅថ្ងៃទី១៣ ខែមីនា ឆ្នាំ២០២៤ កម្ពុជា និងជប៉ុន គ្រោងនឹងចុះកិច្ចព្រមព្រៀងជាផ្លូវការសម្រាប់កម្ចីសម្បទានសរុប ២១,១០៤លានយ៉េន (ស្មើនឹងប្រមាណ ១៥៤លានដុល្លារអាមេរិក) ក្នុងគោលបំណងជំរុញគម្រោងអភិវឌ្ឍន៍មន្ទីរពេទ្យក្នុងតំបន់។

ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក សុខ ចិន្តាសោភា រួមជាមួយអនុរដ្ឋមន្ត្រីការបរទេសជប៉ុន លោក KOMURA Masahiro នឹងអញ្ជើញជាអធិបតីក្នុងពិធីចុះហត្ថលេខាលើលិខិតផ្លាស់ប្តូរ និងឯកសារពាក់ព័ន្ធនៅក្រសួងការបរទេស និងសហប្រតិបត្តិការអន្តរជាតិ។

កម្ចីសម្បទាននេះបញ្ជាក់ពីការប្តេជ្ញាចិត្តយ៉ាងមុតមាំរបស់ប្រទេសជប៉ុនក្នុងការគាំទ្រដល់ការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការលើកកម្ពស់ការអភិវឌ្ឍន៍សេដ្ឋកិច្ចសង្គម។

ក្នុងពេលជាមួយគ្នានេះ ជំនួយហិរញ្ញវត្ថុនេះនឹងជំរុញបន្ថែមទៀតនូវទំនាក់ទំនងយូរអង្វែង និងកិច្ចសហប្រតិបត្តិការជិតស្និទ្ធរវាងប្រជាជាតិទាំងពីរ ដែលត្រូវបានលើកកំពស់ទៅជា "ភាពជាដៃគូយុទ្ធសាស្ត្រគ្រប់ជ្រុងជ្រោយ" នៅឆ្នាំ២០២៣។