ភ្នំពេញ៖ អភិបាលរងខណ្ឌដូនពេញ លោក ចាប ឌីណា បានឱ្យដឹងថា ស៊ីក្លូដែលប្រជាការពារលើកទៅរក្សាទុកនោះ ដោយសារទុកចោលមិនឃើញម្ចាស់មកយកប៉ុន្មានថ្ងៃមកហើយ។
លោក ចាប ឌីណា បានឱ្យដឹងដូចនេះបន្ទាប់ពីមានការចែកចាយវីដេអូតាមបណ្តាញសង្គម ផ្សព្វផ្សាយពីប្រជាការពារលើកស៊ីក្លូដាក់លើរថយន្តនៅត្រង់ចំណុចផ្លូវ១១០ កែងផ្លូវ១៥ (ផ្សារចាស់) ហើយមានមតិរិះគន់ជាច្រើន។
អភិបាលរងខណ្ឌដូនពេញបានលើកឡើងលើបណ្តាញសង្គមលោកនាថ្ងៃទី៣ ខែមីនា ឆ្នាំ២០២៤ ថា «ស៊ីក្លូដែលប្រជាការពារលើកទៅរក្សាទុកនោះ គឺជាស៊ីក្លូដែលប្រជាពលរដ្ឋផ្តល់ព័ត៌មានថាមិនឃើញម្ចាស់ពីរបីថ្ងៃហើយ»។
លោកបានលើកឡើងឱ្យដឹងទៀតថា ដើម្បីរក្សាស៊ីក្លូ និងចង់ដឹងពីសុវត្ថិភាពម្ចាស់ស៊ីក្លូ ទើបរដ្ឋបាលខណ្ឌសម្រេចចិត្តយកទៅរក្សាទុករង់ចាំម្ចាស់មកទទួល ខណៈហេតុការណ៍នេះបានកើតឡើងកាលពីរសៀលថ្ងៃទី២៤ ខែកុម្ភៈ ឆ្នាំ២០២៤ ហើយនៅល្ងាចថ្ងៃទី២៤ ដដែលម្ចាស់ស៊ីក្លូបានមកទទួលយកទៅវិញហើយ។
ទន្ទឹមនេះដែរ ប្រធានក្រុមការងារព័ត៌មាន និងបណ្ដាញសង្គមសម្ដេចមហាបវរធិបតី ហ៊ុន ម៉ាណែត លោក គួច វែងស្រ៊ុន បានលើកឡើងដែរថា វីដេអូខ្លីខាង ត្រូវបានផេកមួយយកមកចែកចាយ ដោយសរសេរ គ្មានការបកស្រាយ ឬសួររកមូលហេតុអ្វីបានប្រជាការពារលើកស៊ីក្លូដាក់ឡានយកទៅខណ្ឌនោះទេ ហើយមហាជនបានចូលទៅខំមិន ហើយជេរ ឬរិះគន់យ៉ាងចាស់ដៃដល់អាជ្ញាធរ។
លោក គួច វែងស្រ៊ុន បានស្នើដល់សាធារណជន កុំវាយតម្លៃលើការផ្សព្វផ្សាយដោយគ្រាន់តែ ឃើញវីដេអូខ្លីមួយជ្រុង ពិសេសចោទប្រកាន់ផ្សេងៗ។
លោកថា៖ «ខ្ញុំជឿថា មិនមែនសុខៗប្រជាការពារទៅធ្វើចឹងនោះទេ ព្រោះគាត់ជាមនុស្សដែរ ហើយអនុវត្តតួនាទី ដែលមិនចង់បានការស្តីបន្ទោសច្រើនជាងការកោតសរសើរនោះទេ។ ពិតច្បាស់ថា អាចនឹងមានចន្លោះប្រហោងណាខ្លះលើការបម្រើសេវា តែសូមបងប្អូនកុំចោទប្រកាន់ជារួម ព្រោះក៏មានភាគច្រើនបងប្អូនប្រជាការពារ ដែលជាអ្នកបម្រើ និងថែរក្សាសុខសណ្តាប់ធ្នាប់របស់យើងប្រចាំថ្ងៃផងដែរ។ ពេលខ្លះពួកគាត់ធ្វើជាអ្នកអនាម័យផងដែរ ដើម្បីតែជីវភាពយើងប្រចាំថ្ងៃ»៕
