កំពង់ស្ពឺ៖ នាពេលថ្មីៗនៅលើបណ្តាញសង្គមនេះមានការបែកធ្លាយវីដេអូគ្រូវិទ្យាល័យសម្តេចឪសម្តេចម៉ែបរសេដ្ឋ ខេត្តកំពង់ស្ពឺ ដាក់វិន័យសិស្សដែលមិនពាក់ស្បែកជើងប៉ាត់តា ឱ្យលុតជង្គង់ និងសំពះស្បែកជើង។ ការដាក់វិន័យរបស់សាលានេះមានទាំងការគាំទ្រ និងមិនគាំទ្រ។

អ្នកនាំពាក្យក្រសួងអប់រំ យុវជន និងកីឡា លោកស្រី ឃួន វិច្ឆិកា បានបញ្ជាក់មក EAC ថា នៅក្នុងសេចក្តីណែនាំរបស់ក្រសួង នៅថ្ងៃបើកបវសនកាលសម្រាប់ឆ្នាំ២០២៣-២០២៤ មិនមានការណែនាំឱ្យដាក់វិន័យលើសិស្សដែលមិនពាក់ស្បែកជើងប៉ាត់តានោះទេ។ តែយ៉ាងណាលោកស្រីថា សាលារៀននីមួយៗអាចធ្វើការប្រជុំជាមួយមាតាបិតាសិស្សក្នុងការកំណត់នូវបទបញ្ជាផ្ទៃក្នុងសាលាបន្ថែមដើម្បីពង្រឹងគុណភាពការសិក្សារបស់សិស្សានុសិស្ស។ ប៉ុន្តែការដាក់វិន័យគឺត្រូវអនុវត្តគោរពទៅតាមក្រមសីលធម៌វិជ្ជាវីវៈ និងមនុស្សធម៌។

លោកស្រីអ្នកនាំពាក្យថ្លែងដូច្នេះថា៖ «ការវិន័យនេះផងដែរ ក៏ត្រូវតែគោរពទៅតាមក្រមសីលធម៌វិជ្ជាវីវៈ ភាពថ្លៃថ្នូរ និងមនុស្សធម៌ ដើម្បីគោលដៅធានាការអប់រំរបស់សិស្សានុសិស្សម្នាក់ៗ»។

បើតាមអ្នកនាំពាក្យ ក្រសួងអប់រំបានណែនាំឱ្យគណៈគ្រប់គ្រងសាលាអនុវត្តវិន័យឱ្យបានត្រឹមត្រូវ ដើម្បីអប់រំឱ្យសិស្សមានឥរិយាបថ និងជោគជ័យលើការសិក្សា។

នាយកវិទ្យាល័យសម្តេចឪសម្តេចម៉ែបរសេដ្ឋ លោក ម៉ៅ ម៉ុន បានបញ្ជាក់នៅក្នុងសេចក្តីបំភ្លឺថា សាលាត្រូវបានគំរាមប្តឹងពីអាណាព្យាបាល និងមាតាបិតាសិស្សលើការដាក់វិន័យឱ្យសិស្សសំពះទ្រនាប់ជើង ហើយក៏បានដោះស្រាយបញ្ចប់ទំនាស់រួចរាល់ ដោយសាលាបានសន្យាថានឹងមិនអនុវត្តវិន័យនេះតទៅទៀតនោះទេ៕