កងទ័ពជើងអាកាសអាមេរិកម្នាក់ស្លាប់ក្រោយចាក់សាំងដុតខ្លួនឯងជាការតវ៉ានឹងសង្គ្រាមអ៊ីស្រាអែលនៅតំបន់ហ្គាហ្សា
សហរដ្ឋអាមេរិក៖ អាជ្ញាធរបានបញ្ជាក់ថា កងកម្លាំងយោធាអាមេរិកម្នាក់បានទទួលមរណភាព បន្ទាប់ពីបានធ្វើសកម្មភាពចាក់ប្រេងដុតខ្លួនឯងក្នុងការតវ៉ាមួយនៅមុខស្ថានទូតអ៊ីស្រាអែលក្នុងទីក្រុងវ៉ាស៊ីនតោន កាលពីថ្ងៃទី២៥ ខែកុម្ភៈ ក្នុងគោលបំណងប្រឆាំងទៅនឹងសង្គ្រាមដែលកំពុងកើតឡើងនៅក្នុងតំបន់ហ្គាហ្សា។
គួរឱ្យដឹងថា ក្រោយពីកើតហេតុ បុរសដែលបានដុតខ្លួនឯងនេះត្រូវបានគេបញ្ជូនទៅសង្គ្រោះបន្ទាន់ភ្លាមៗនៅមន្ទីរពេទ្យមួយក្បែរនោះ ក្រោយការព្យាយាមសង្គ្រាះដោយភ្នាក់ងារសង្គ្រោះ និងពន្លត់អគ្គិភ័យ។ បើតាមអ្នកនាំពាក្យកងទ័ពជើងអាកាសបានឱ្យដឹងថា ជនរងគ្រោះក្នុងឧបទ្ទវហេតុនេះគឺជាកងទ័ពសកម្មនៃកងទ័ពអាកាសអាមេរិក។
ក្នុងវីដេអូនៃការតវ៉ារបស់កងទ័ពដែលបានធ្វើអត្តឃាតនេះ គេឃើញថាបុរសខាងលើបានស្លៀកពាក់ជាឯកសណ្ឋានយោធា និងបាននិយាយថា៖ "ខ្ញុំលែងមានអារម្មណ៍ស្មុគស្មាញដោយសារអំពើប្រល័យពូជសាសន៍ទៀតហើយ"។ បន្ទាប់មកទៀត គេឃើញថាបុរសខាងលើបានចាក់វត្ថុរាវម្យ៉ាងលើសម្លៀកបំពាក់ និងបានដុតខ្លួនឯងតែម្តង និងបានស្រែកខ្លាំងៗថា៖ "Free Palestine (ដោះលែងប៉ាឡេស្ទីន)"។
ដោយឡែក ឧត្តមសេនីយ៍ Patrick Ryder ជាអ្នកនាំពាក្យនៃមន្ទីរបញ្ចកោណបាននិយាយថា រដ្ឋមន្ត្រីការពារជាតិអាមេរិក លោក Lloyd Austin ក៏បានតាមដានជាប់អំពីស្ថានការណ៍ និងហេតុការណ៍នេះផងដែរ។ ថ្មីៗនេះ ស្ថានទូតអ៊ីស្រាអែលបានក្លាយជាគោលដៅនៃការតវ៉ារបស់មហាជនអំពីបញ្ហាសង្គ្រាមនៅតំបន់ហ្គាហ្សា។ ជាក់ស្ដែង បញ្ហាសង្គ្រាមនៅតំបន់ហ្គាហ្សានេះ បាននាំឱ្យមានការបែងចែកជាក្រុមតវ៉ាប្រឆាំងនឹងអ៊ីស្រាអែល និងក្រុមតវ៉ាប្រឆាំងនឹងក្រុមហាម៉ាសប៉ាឡេស្ទីនកើតឡើងជាច្រើនហូរហែរនៅសហរដ្ឋអាមេរិក។
គួររំឮកថា កាលពីខែធ្នូកន្លងទៅ ក៏មានអ្នកតវ៉ាជាស្រ្តីម្នាក់បានចាក់សាំងដុតខ្លួនឯង នៅខាងក្រៅស្ថានកុងស៊ុលអ៊ីស្រាអែលក្នុងទីក្រុងអាត្លង់តាផងដែរ៕
ព័ត៌មានជាច្រើនទៀតសម្រាប់អ្នក
