ភ្នំពេញ៖ ករណីគ្រោះថ្នាក់ចរាចរណ៍បុកបុរសម្នាក់បណ្តាលឱ្យស្លាប់នៅសង្កាត់កាកាប១ ខណ្ឌពោធិ៍សែនជ័យ រំលងអាធ្រាត្រឈានចូលថ្ងៃទី២៣ ខែកុម្ភៈ គឺបង្កឡើងដោយអ្នកបើកបរជនជាតិចិនឈ្មោះ Fu Zhong Hua ក្រោមឥទ្ធិពលគ្រឿងស្រវឹងមានកម្រិតជាតិអាល់កុល ០.៨៦មីលីក្រាមក្នុងមួយលីត្រនៃខ្យល់ រួមដំណើរជាមួយជនជាតិម្នាក់ទៀត។

អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សំ វិច្ឆិកា បានបញ្ជាក់ប្រាប់ EAC ថា ក្រោយជនបង្កបើករថយន្តបុកម៉ូតូជនរងគ្រោះពីក្រោយបណ្តាលឱ្យស្លាប់ភ្លាមៗនៅហ្នឹងកន្លែង ជនបង្កបានព្យាយាមជិះរត់គេច តែត្រូវបានប្រជាពលរដ្ឋ និងសមត្ថកិច្ចតាមស្ទាក់ចាប់យកមកការិយាល័យនគរបាលចរាចរណ៍ផ្លូវគោកដើម្បីអនុវត្តតាមនិតិវិធី។

លោកវរសេនីយ៍ឯក សំ វិច្ឆិកា បានបញ្ជាក់ថា ជនបង្កត្រូវបានសមត្ថកិច្ចកសាងសំណុំរឿងបញ្ជូនទៅតុលាការហើយនាថ្ងៃទី២៣ ខែកុម្ភៈ ឆ្នាំ២០២៤៕