ភ្នំពេញ៖ រដ្ឋលេខាធិការក្រសួងសង្គមកិច្ច និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានចូលរួមអបអរសាទរជូនដល់ស្ត្រីទី១ កម្ពុជាលោកស្រី ពេជ ចន្ទមុន្នី ហ៊ុនម៉ាណែត ដែលទទួល នាមាភិធេយ្យកិត្តិយសជាន់ខ្ពស់ ក្នុងឋានៈជា «អភិសិរីបវរពុទ្ធសាសនូបការធរជោតិកា» ពីគណៈសង្ឃនាយក និងសាកលវិទ្យាល័យបញ្ញាសាស្ត្រកម្ពុជា។

លោក ឯម ច័ន្ទមករា បានលើកឡើងថា លោកស្រី ពេជ ចន្ទមុន្នី ពិតជាសាកសមនិងទទួលបាននាមាភិធេយ្យកិត្តិយសជាន់ខ្ពស់នេះ ក្នុងកិច្ចការដែលលោកស្រីបានចូលរួមជាច្រើនដើម្បីសង្គមជាតិនិងសាសនានៅកម្ពុជា។

ក្នុងលិខិតកាលថ្ងៃអាទិត្យ ថ្ងៃទី១៨ ខែកុម្ភៈ ឆ្នាំ២០២៤ គណៈសង្ឃនាយក និងសាកលវិទ្យាល័យបញ្ញាសាស្ត្របានលើកឡើងថា លោកស្រីបណ្ឌិត ពេជ ចន្ទមុន្នី ហ៊ុនម៉ាណែត គឺជាកូនខ្មែរមួយរូបដែលទ្រទ្រង់នូវគុណវឌ្ឍដ៏ប្រសើរថ្លៃថ្លា ហើយបានបំពេញ នូវហិតានុហិតប្រយោជន៍ដ៏ឧត្តមក្នុងព្រះពុទ្ធសាសនា និងសង្គមជាតិ ដើម្បីសុខសន្តិភាពដល់សត្វលោក។

លោកស្រី ពេជ ចន្ទមុន្នី ក៏បានអរព្រះគុណ និងអរគុណដល់ គណៈសង្ឃនាយក និងក្រុមប្រឹក្សាភិបាលនៃសាកលវិទ្យាល័យបញ្ញាសាស្ត្រកម្ពុជា ផងដែរដែលបានផ្ដល់ជូននាមាភិធេយ្យកិត្តិយសជាន់ខ្ពស់ ក្នុងឋានៈជា «អភិសិរីបវរពុទ្ធសាសនូបការធរជោតិកា» នេះ៕