ភ្នំពេញ៖ រយៈពេលមួយសប្តាហ៍ក្រោយពីមានបទបញ្ជារបស់សម្តេចធិបតី ហ៊ុន ម៉ាណែត សមត្ថកិច្ចបង្រ្កាបបានល្បែងស៊ីសងខុសច្បាប់ចំនួន ១៤៨ករណី ឃាត់ខ្លួនអ្នកពាក់ព័ន្ធចំនួន ១៨៧នាក់ ក្នុងនោះបញ្ចូនទៅតុលាការចំនួន ១៣នាក់ និងអប់រំ ណែនាំធ្វើកិច្ចសន្យាបញ្ឈប់ចំនួន ១៧៤នាក់។

 អ្នកនាំពាក្យរងក្រសួងមហាផ្ទៃ លោក ទូច សុខៈ បានបញ្ជាក់ឱ្យដឹងតាមរយៈសំណេរនៅថ្ងៃទី១៩ ខែកុម្ភៈនេះថា ករណីល្បែងស៊ីសងខុសច្បាប់ដែលសមត្ថកិច្ចបង្រ្កាបបានមាននៅក្នុងខេត្តបាត់ដំបងចំនួន ១៣៦ករណី ខេត្តកំពត ៥ករណី ខេត្តតាកែវ១ករណី ខេត្តប៉ៃលិន ១ករណី និងខេត្តត្បូងឃ្មុំ ១ករណី។

គួរជម្រាបថា វិធានការចុះបង្រ្កាបល្បែងស៊ីសងខុសច្បាប់នេះ ជាការងារអាទិភាពរបស់ក្រសួងមហាផ្ទៃ ក្នុងចំណោមការងារអាទិភាពសំខាន់ៗជាច្រើនទៀតក្នុងអាណត្តិរាជរដ្ឋាភិបាលទី៧នេះ។

នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត កាលពីថ្ងៃទី១៤ ខែកុម្ភៈ ឆ្នាំ២០២៤ បានបញ្ជាឱ្យសមត្ថកិច្ចនៅតាមមូលដ្ឋានបង្រ្កាបទីតាំងល្បែងស៊ីសង ឆ្នោតឡូតូ ឱ្យអស់ ដោយមិនត្រូវបន្តឱ្យមានការបើកទីតាំងល្បែងផ្សងសំណាងតទៅទៀតទេ៕