សម្តេចធិបតី ណែនាំរដ្ឋបាលរាជធានីភ្នំពេញត្រៀមរថយន្តក្រុងឥតគិតថ្លៃដឹកពលរដ្ឋទៅលេងស្រុកកំណើតនៅថ្ងៃចូលឆ្នាំខ្មែរ
ភ្នំពេញ៖ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានប្រាប់ឱ្យរដ្ឋបាលរាជធានីភ្នំពេញ ត្រៀមរថយន្តក្រុងដឹកពលរដ្ឋពីភ្នំពេញទៅតាមបណ្តាខេត្តនាថ្ងៃចូលឆ្នាំប្រពៃណីដោយឥតគិតថ្លៃដូចនឹងបណ្តាឆ្នាំកន្លងៗទៅផងដែរដើម្បីកាត់បន្ថយការចំណាយ និងផ្តល់សុវត្ថិភាពដល់ពលរដ្ឋ។
ក្នុងពិធីបើកការដ្ឋានសាងសង់ស្ពានចាក់អង្រែក្រោម-ព្រែកប្រា នាព្រឹកថ្ងៃចន្ទ ទី១៩ ខែកុម្ភៈ ឆ្នាំ២០២៤ សម្តេចធិបតីបានថ្លែងថា៖ «តិចទៀត ជិតដល់ចូលឆ្នាំខ្មែរ អ៊ីចឹងត្រៀមមធ្យោបាយដឹកជញ្ជូន ដឹកបងប្អូនយើងពីភ្នំពេញទៅស្រុកដូចរាល់ឆ្នាំ កុំភ្លេចទឹកសុទ្ធឱ្យគាត់ផង»។
គូសជម្រាបឱ្យដឹងថា ការរៀបចំរថយន្តក្រុងសាធារណៈសម្រាប់ពលរដ្ឋនាថ្ងៃចូលឆ្នាំខ្មែរ ឬពិធីបុណ្យភ្ជុំបិណ្ឌ គឺជាការយកចិត្តទុកដាក់របស់អតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន មកម្ល៉េះ ដើម្បីសុខទុក្ខរបស់ពលរដ្ឋ៕
ព័ត៌មានជាច្រើនទៀតសម្រាប់អ្នក
