ភ្នំពេញ៖ តារាកំប្លែង នាយគ្រឿន បានបញ្ជាក់ពីការតាំងចិត្តថា លោកឈប់ទទួលផ្សាយពាណិជ្ជកម្មអំពីល្បែងហ្គេម និងគ្រឿងស្រវឹង បន្ទាប់ពីលោករងការរិះគន់ខ្លាំងចំពោះការសម្តែងក្នុងបទចម្រៀងរបស់ក្រុមហ៊ុនមួយ ជំរុញឱ្យពលរដ្ឋលេងល្បែងអនឡាញ។

កាលពីថ្ងៃទី១២ ខែកុម្ភៈ ឆ្នាំ២០២៤ នាយគ្រឿន បានចេញវីដេអូសុំទោស និងទទួលស្គាល់កំហុសដែលខ្លួនជាបុគ្គលសាធារណៈទៅផ្សព្វផ្សាយពាណិជ្ជកម្មល្បែងអនឡាញធ្វើឱ្យពលរដ្ឋជាច្រើនរិះគន់ និងជេរប្រមាថ។

ក្នុងវីដេអូ ៧នាទី នាយគ្រឿន បានបញ្ជាក់ថា លោកបានផ្តាច់កុងត្រាជាមួយក្រុមហ៊ុននៅពាក់កណ្តាលទី។

នាយគ្រឿនបានរៀបរាប់ដូច្នេះថា៖ «បើបងប្អូនអត់សប្បាយចិត្ត យើងនៅផ្សាយធ្វើអីទៀត មានអីស៊ីហ្នឹងទៅ ខ្ញុំទទួលបានប៉ុនណា ធ្វើប៉ុណ្ណឹងទៅ សំខាន់ពាក់ព័ន្ធជាមួយល្បែង និងស្រា គឺខ្ញុំឈប់ផ្សាយមួយជីវិត»។

នាយគ្រឿន បញ្ជាក់ថា កាលលោកចូលសិល្បៈដំបូង លោកធ្លាប់ទទួលរងការរិះគន់ម្តងរួចមកហើយពាក់ព័ន្ធនឹងការផ្សាយពាណិជ្ជកម្មគ្រឿងស្រវឹង។ ក្រោយមកលោកក៏ទទួលផ្សាយគ្រឿងស្រវឹងឡើងវិញ បន្ទាប់ពីសង្កេតឃើញថាមានតារាកំពូលៗមួយចំនួនចូលរួមផ្សាយពាណិជ្ជកម្មគ្រឿងស្រវឹង៕