ភ្នំពេញ៖ ស្នងការដ្ឋាននគរបាលរាជធានីភ្នំពេញ បានបញ្ជាក់ថា សមត្ថកិច្ចបានរកឃើញរថយន្តរបស់ជនបង្កដែលបើកបុកឪពុក កូនប្រុស ស្រី ៣នាក់ ស្លាប់ និងរបួសធ្ងន់ធ្ងរនៅផ្លូវ៦០ម៉ែត្រ កាលពីយប់ថ្ងៃទី១១ ខែកុម្ភៈ ឆ្នាំ២០២៤។

បើតាមស្នងការ ជនបង្កក្រោយបើកបុកមនុស្សស្លាប់ និងរងបួសរួចមក បានជិះរត់គេចខ្លួន ហើយជិះមកចតប្លុងចោលនៅមុខអាគារ បុរី អ & អេហ្វ (R&F) ស្ថិតនៅលើផ្លូវ ៦០ម៉ែត្រ សង្កាត់ចាក់អង្រែលើ ខណ្ឌមានជ័យ។

រថយន្តជនបង្កពាក់ស្លាកលេខ 2AQ-1520 បានបើកបុកពីក្រោយម៉ូតូម៉ាក HONDA CUB ពណ៌ខៀវ ពាក់ស្លាកលេខ ភ្នំពេញ ស្លាកលេខ 1AV-8317 បណ្តាលឱ្យស្លាប់កូនស្រីម្នាក់ ឪពុករបួសធ្ងន់ ហើយកូនប្រុសម្នាក់ទៀតរងរបួសមធ្យម។

បច្ចុប្បន្នរថយន្តបង្ក ត្រូវបានយកមករក្សាទុកនៅការិយាល័យនគរបាលចរាចរណ៍ផ្លូវគោក ចំណែកអ្នកបើកបរបង្ក សមត្ថកិច្ចបានកំណត់មុខសញ្ញារួចហើយ។

សមត្ថកិច្ចសូមឱ្យអ្នកបើកបរបង្កចូលខ្លួនមកស្នងការដ្ឋាននគរបាលរាជធានីភ្នំពេញ ដើម្បីអនុវត្តតាមនីតិវិធី៕