សៀមរាប៖ ក្នុងឱកាសបុណ្យចូលឆ្មាំថ្មីប្រពៃណីចិន-វៀតណាមឆ្នាំ២០២៤ រយៈពេល ៣ថ្ងៃនេះ មានភ្ញៀវទេសចរជាតិ អន្តរជាតិ បានដើរកម្សាន្តតាមរមណីយដ្ឋាននានាក្នុងខេត្តសៀមរាបជាង ១១ម៉ឺននាក់ កើនឡើងចំនួនជាង ១១ភាគរយ ធៀបនឹងឆ្នាំមុន។
តាមរបាយការណ៍របស់មន្ទីរទេសចរណ៍ខេត្តសៀមរាប នាថ្ងៃទី១២ ខែកុម្ភៈ ឆ្នាំ២០២៤ បានឲ្យដឹងថា ក្នុងឱកាសបុណ្យចូលឆ្មាំថ្មីប្រពៃណីជនជាតិចិន- វៀតណាម ពីថ្ងៃទី៩ ដល់ថ្ងៃទី១១ ខែកុម្ភៈ ឆ្នាំ២០២៤នេះ មានភ្ញៀវទេសចរជាតិ អន្តរជាតិ និងពលរដ្ឋរស់នៅក្នុងខេត្ត បានដើរកម្សាន្តតាមរមណីយដ្ឋាននានាក្នុងខេត្តសៀមរាប ចំនួន ១១៧ ៦៧៧នាក់ កើនឡើងចំនួន ១១,៥៦ភាគរយ បើប្រៀបធៀបនឹងឆ្នាំ២០២៣ ដែលមានចំនួន ១០៥ ៤៨១នាក់។
របាយការណ៍ដដែលបានឱ្យដឹងទៀតថា ភ្ញៀវទេសចរជាតិ និងប្រជាពលរដ្ឋក្នុងខេត្ត មានចំនួនប្រមាណ ៩៩ ៦០០នាក់ កើន ឡើងចំនួន ១០,៦៧ភាគរយបើប្រៀបធៀបនឹងរយៈពេលដូចគ្នាឆ្នាំ២០២៣ ចំនួនប្រមាណ ៩ពាន់នាក់។
ទន្ទឹមនោះ ភ្ញៀវទេសចរអន្តរជាតិ មានចំនួន ១៨ ០៧៧នាក់ កើនឡើងចំនួន ១៦, ៧៧ភាគរយ បើប្រៀបធៀបនឹងរយៈពេលដូចគ្នាឆ្នាំ២០២៣ ដែលមានចំនួន ១៥ ៤៨១នាក់។
គួរឱ្យដឹងដែរថា ខេត្តសៀមរាបជាតំបន់ទេសចរណ៍ដ៏សំខាន់របស់ប្រទេសកម្ពុជា ដោយសារខេត្តនេះមានប្រាសាទអង្គរវត្តដ៏ល្បីល្បាញ និងប្រាសាទបុរាណដទៃទៀតជាច្រើន។ ថ្មីៗនេះ ក្រុងសៀមរាបកំពុងប្រែក្លាយរូបរាងជាក្រុងទំនើបតាមរយៈកំណើនសណ្ឋាគារ ភោជនីយដ្ឋាន ហាងលក់ទំនិញ ជាដើមដែលបម្រើឱ្យវិស័យទេសចរណ៍។
រមណីយដ្ឋានផ្សេងទៀតដែលនៅក្បែរក្រុងសៀមរាបមានរាជធានីអង្គរធំ ប្រាសាទអង្គរវត្ត ប្រាសាទបាយ័ន ប្រាសាទភ្នំបាខែង ប្រាសាទបក្សីចាំក្រុង ប្រាសាទបាពួន ប្រាសាទភិមានអាកាស ប្រាសាទបន្ទាយស្រី ប្រាសាទតាព្រហ្ម និងប្រាសាទរាប់រយផ្សេងទៀត៕
