កំពង់ស្ពឺ៖ រដ្ឋបាលស្រុកភ្នំស្រួចបានបញ្ជាក់នៅក្នុងសេចក្តីជូនដំណឹងថា ករណីហិង្សានៅលើភ្នំគីរីរម្យបង្កការភ្ញាក់ផ្អើលកាលពីថ្ងៃទី១១ ខែកុម្ភៈ ឆ្នាំ២០២៤ គឺកើតចេញពីករណីគ្រោះថ្នាក់ចរាចរណ៍ ទើបបណ្តាលឱ្យបង្កជាជម្លោះហិង្សាវាយប្រតប់គ្នារវាងភាគីម៉ូតូទាំងសងខាង។

រដ្ឋបាលស្រុកភ្នំស្រួច បានបញ្ជាក់ថា មុនពេលកើតហេតុ ម៉ូតូម៉ាក Scopy-I ពណ៌ក្រហមគ្មានស្លាកលេខ សេរីឆ្នាំ២០២២ ជិះគ្នា ២នាក់បានជិះទៅបុកភាគីម៉ូតូមួយគ្រឿងទៀត ម៉ាកហុងដា ១២៥ ស្លាកលេខ1KK-4037 ជិះគ្នា ២នាក់ បណ្តាលឱ្យដួលម៉ូតូទាំង២។ បន្ទាប់ពីដួលភាគីខាងម៉ូតូអាសង់ដែលដួលបានជិះមកដល់កន្លែងកើតហេតុ ហើយក៏ទាញដំបងមែកស្រល់ដេញវាយទៅលើភាគីដួលម៉ូតូ Scopy-I ម្នាក់ និងបក្សពួករបស់ភាគីខាងម៉ូតូ Scopy-I ដែលមកដល់ដែរនោះ។ ចំណែកភាគីម៉ូតូអាសង់ដែលដួលក៏បានងើបពីដួលវិញក៏ទាញដំបងឫស្សីបម្រុងវាយភាគីម្ខាងទៀត ប៉ុន្តែមានគេចាប់ឃាត់។

បើតាមរដ្ឋបាលស្រុកភ្នំស្រួច ក្នុងចំណោមភាគីដែលជិះទៅបុកគេនោះ មានម្នាក់រងរបួសធ្ងន់ កំពុងសម្រាកព្យាបាលនៅមន្ទីរពេទ្យត្រយឹង ស្ថិតនៅក្នុងឃុំត្រែងត្រយឹង ស្រុកភ្នំស្រួច ខេត្តកំពងស្ពឺ។ ចំណែកបក្សពួកខាងភាគីម៉ូតូអាសង់ម្នាក់ ក្នុងចំណោមបក្សពួកផ្សេងទៀត កំពុងរត់គេចខ្លួន។

ក្រោយកើតហេតុកម្លាំងអធិការដ្ឋាននគរបាលស្រុក បានឃាត់ខ្លួនមុខសញ្ញាភាគីខាងម៉ូតូអាសង់ចំនួន៣នាក់ បញ្ជូនទៅអធិការដ្ឋាននគរបាលស្រុកភ្នំស្រួចដើម្បីកសាងសំណុំរឿងអនុវត្តតាមនីតិវិធី ហើយសមត្ថកិច្ចបានដកហូតម៉ូតូចំនួន ៣គ្រឿងផងដែរ៕