អ៊៊ីរ៉ាក់៖ អ្នកនាំពាក្យនាយករដ្ឋមន្រ្តីអ៊ីរ៉ាក់ លោក Yahya Rasool បានថ្លែងប្រាប់នៅថ្ងៃព្រហស្បតិ៍ម្សិលមិញនេះថា ការវាយប្រហាររបស់សហរដ្ឋអាមេរិកម្តងហើយម្តងទៀតប្រឆាំងនឹងក្រុមប្រដាប់អាវុធគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ កំពុងជំរុញឱ្យរដ្ឋាភិបាលបញ្ចប់បេសកកម្មនៃក្រុមចម្រុះដឹកនាំដោយសហរដ្ឋអាមេរិកនៅក្នុងប្រទេសរបស់ខ្លួន។

ដោយឡែក យោធាអាមេរិកបានបញ្ជាក់ថា ការវាយប្រហារដែលបានកើតឡើងកាលពីថ្ងៃពុធកន្លងទៅបានសម្លាប់មេបញ្ជាការម្នាក់នៃក្រុម Kataib Hezbollah ជាក្រុមប្រដាប់អាវុធគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ ដែលកន្លងមកមន្ទីរបញ្ចកោណអាមេរិកបានថ្កោលទោសទៅលើក្រុមនេះចំពោះសកម្មភាពវាយប្រហារមកលើយោធារបស់ខ្លួន។ 

លោក Rasool បានបញ្ជាក់នៅក្នុងសេចក្តីថ្លែងការណ៍មួយថា ក្រុមចម្រុះដឹកនាំដោយសហរដ្ឋអាមេរិកបានក្លាយទៅជាកត្តាមួយដែលជាមូលហេតុនៃអស្ថិរភាព និងជាការគម្រាមកំហែង និងលូកដៃចូលក្នុងអធិបតេយ្យអ៊ីរ៉ាក់នៅក្នុងវដ្តនៃជម្លោះ។ គួរបញ្ជាក់ថា សម្ព័ន្ធ​យោធា​អន្តរជាតិ​ដឹកនាំ​ដោយ​សហរដ្ឋអាមេរិកដែលមានមូលដ្ឋាន​នៅ​អ៊ីរ៉ាក់​ ត្រូវបាន​បង្កើត​ឡើង​ដើម្បី​ប្រយុទ្ធ​ប្រឆាំង​នឹង​ក្រុម​រដ្ឋ​អ៊ីស្លាម ដែលក្នុងនោះសហរដ្ឋអាមេរិកមានកងកម្លាំងឈរជើងនៅអ៊៊ីរ៉ាក់ចំនួន ២,៥០០នាក់ ដែលជាក្រុមផ្តល់ប្រឹក្សា និងជួយប្រឆាំងជៀសវាងវត្តមានជាថ្មីនូវក្រុមសកម្មប្រយុទ្ធអ៊ីស្លាម។

គួរបញ្ជាក់ថា ចាប់តាំងពីមានការផ្ទុះឡើងនូវសង្គ្រាមរវាងអ៊ីស្រាអែល និងហាម៉ាសកាលពីខែតុលាកន្លងទៅ គេសង្កេតឃើញថាមានការវាយប្រហារគ្នាបានកើតឡើងស្ទើរតែរៀងរាល់ថ្ងៃនៅលើទឹកដីស៊ីរី និងអ៊ីរ៉ាក់ ដែលជាការប៉ះទង្គិចគ្នារវាងក្រុមប្រដាប់អាវុធដែលគាំទ្រអ៊ីរ៉ង់ និងកងកម្លាំងសហរដ្ឋអាមេរិកដែលឈរជើងក្នុងតំបន់នោះ៕