កំពង់ស្ពឺ៖ គ្រោះថ្នាក់ចរាចរណ៍ក្រឡាប់ផ្ងាជើងរថយន្ត Alpha លើផ្លូវល្បឿនលឿន ចន្លោះគីឡូម៉ែតលេខ២០ ហួសច្រកចេញកំពង់ស្ពឺខាងកើតបន្ដិច បណ្ដាលឲ្យរងរបួសមនុស្សស្លាប់និងរងរបួស។ នេះបើយោងតាមស្នងការដ្ឋាននគរបាលខេត្តកំពង់ស្ពឺ។

ករណីគ្រោះថ្នាក់នេះកើតឡើងនាព្រឹក ថៃ្ងទី៧ ខែកុម្ភៈ ឆ្នាំ២០២៤ វេលាម៉ោងប្រមាណ ០៧:១២នាទីខណៈពេលនេះ សមត្ថកិច្ចនគរបាល អធិការដ្ឋានស្រុកសំរោងទង នៃស្នងការដ្ឋាននគរបាលខេត្ដកំពង់ស្ពឺ បានសហការអន្ដរាគមន៍ជួយសង្គ្រោះ។

ស្នងការដ្ឋាននគរបាលខេត្តកំពង់ស្ពឺបានឱ្យដឹងថា តាមការបញ្ជាក់ពីព័ត៌មានបឋមពីអ្នកឃើញហេតុការណ៍ថា រថយន្ត Alpha ពណ៌សដឹកមនុស្សលក្ខណៈ គ្រួសារ ០៧នាក់ ក្នុងគោលបំណងទៅលេងខេត្ដព្រះសីហនុ អ្នកបើកបរ ជាស្រ្ដី និងមានអ្នកស្លាប់ ០៥នាក់ និង របួសធ្ងន់០២នាក់។

ជុំវិញករណីគ្រោះថ្នាក់ចរាចរណ៍នេះ អភិបាលខេត្តកំពង់ស្ពឺ លោក វ៉ី សំណាង ក៏បានសម្តែងការសោកស្តាយ និងសេចក្តីរន្ធត់ ដោយលោកបានស្នើដល់អ្នកបើកបរឱ្យមានការប្រុងប្រយ័ត្នជាប់ជានិច្ច ដោយមិនត្រូវ: វ៉ាជែងក្នុងស្ថានភាពមិនល្អ គោរពល្បឿននៃការបើកបរ មិនត្រូវបើកក្នុងស្ថានភាពដែលងងុយដេក ឬស្រវឹងឡើយ។

គួរឱ្យដឹងដែរថា កាលពីថៃ្ងម្សិលមិញ ថ្ងៃទី៦ ខែកុម្ភៈ ឆ្នាំ២០២៤ ក្បែរកន្លែងកើតហេតុខាងលើនេះ ក៏មានករណីគ្រោះថ្នាក់ចរាចរណ៍ដោយ រថយន្ដRangrover មួយគ្រឿង បុករបាំងបាំងផ្លូវបណ្ដាលឲ្យខូតខាតយ៉ាងដំណំ និងរងរបួសផងដែរ៕