ព្រៃវែង៖ ស្នងការនគរបាលខេត្តព្រៃវែង លោកឧត្តមសេនីយ៍ទោ ឈឿន ប៊ុនឆន បានបញ្ជាឱ្យនគរបាលខេត្តព្រៃវែងបន្តបោសសម្អាតគ្រឿងញៀន ក្មេងទំនើង សិស្សគេចសាលា និងអំពើលួចប្លន់ឱ្យអស់ពីខេត្តព្រៃវែង។

លោកឧត្តមសេនីយ៍ទោ ឈឿន ប៊ុនឆន បានចេញបទបញ្ជានេះក្នុងឱកាសបើកកិច្ចប្រជុំបូកសរុបលទ្ធផលការងារប្រចាំខែមករា និងលើកទិសដៅការងារប្រចាំខែកុម្ភៈ ឆ្នាំ២០២៤ នៅថ្ងៃទី០៥ ខែកុម្ភៈ ឆ្នាំ២០២៤។

លោកឧត្តមសេនីយ៍ទោ បានកោតសរសើរដល់នគរបាលខេត្តព្រៃវែងដែលកន្លងមកបានបង្រ្កាបក្រុមក្មេងទំនើង និងប្រមូលក្មេងៗដែលគេចសាលាយកមកអប់រំ ធ្វើកិច្ចសន្យា ជាពិសេសការបង្រ្កាប និងបំបែកសំណុំរឿងបទល្មើសធំៗ ដែលទទូលបានការសាទរ និងកោតសរសើរពីថ្នាក់ដឹកនាំ លោកគ្រូអ្នកគ្រូ អាណាព្យាបាល និងសាធារណជន។

លោកឧត្តមសេនីយ៍ទោ ឈឿន ប៊ុនឆន ក៏បានដាក់ចេញនូវយន្តការ និងផែនការបន្ថែមសម្រាប់នគរបាលខេត្តព្រៃវែង អនុវត្តបន្តដើម្បីពង្រឹងសមត្ថភាពនគរបាល និងពង្រឹងបង្កើនប្រសិទ្ធភាពការងារបន្ថែមទៀត ក្នុងការបម្រើសង្គមជាតិ និងប្រជាពលរដ្ឋ។

ជាមួយគ្នានេះលោកស្នងការបានណែនាំនគរបាលត្រូវខំប្រឹងបន្តយុទ្ធនាយការបោសសម្អាតគ្រឿងញៀន ក្មេងទំនើង សិស្សគេចសាលា និងអំពើលួចប្លន់គ្រប់រូបភាពទាំងអស់ដើម្បីសុវត្ថិភាពពលរដ្ឋក្នុងខេត្តព្រៃវែង៕