សៀមរាប៖ អ្នកភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប នឹងចាប់ត្រីរួមគ្នានៅបឹងបុរាណមួយដែលអ្នកភូមិរួមគ្នាអភិរក្ស នៅថ្ងៃទី ១១ ខែកុម្ភៈ ឆ្នាំ២០២៤ ខាងមុខនេះ។ ពិធីចាប់ត្រីរួមគ្នានេះ ធ្វើឡើងសម្រាប់ធ្វើម្ហូបត្រៀមពិធីឡើងមាឃ ឬឡើងអ្នកតា ដែលពិធីនេះតែងប្រារព្ធជារៀងរាល់ឆ្នាំ។

ពិធីចាប់ត្រីរួមគ្នានេះ ជាទំនៀមទម្លាប់របស់អ្នកភូមិអង្កោងតាំងពីបុរាណមកម្ល៉េះ ដែលពិធីចាប់ត្រីនេះគឺចាប់ដោយប្រើឧបករណ៍នេសាទបុរាណខ្មែរដូចជា សំណាញ់ អង្រុត ឈ្នាង និងទ្រុងជាដើម។

ពិធីនេះអនុញ្ញាតឱ្យអ្នកភូមិបង្កោងតែប៉ុណ្ណោះដែលមានសិទ្ធិចាប់ត្រី ប៉ុន្តែបន្ទាប់ពីបញ្ចប់ពិធីនេះអ្នកភូមិផ្សេងទៀតអាចមានសិទ្ធិមករកត្រីនៅបឹងនេះបានបងផងដែរ។

ប្រពៃណីចាប់ត្រីរួមគ្នារបស់អ្នកភូមិបង្កោងនេះ គឺធ្វើឡើងតែមួយឆ្នាំម្តងតែប៉ុណ្ណោះ ដែលអ្នកភូមិបានរួមគ្នាអភិរក្សបឹងបុរាណមួយដោយហាមឃាត់មិនឱ្យនេសាទនោះទេ ដើម្បីទុកប្រារព្ធពិធីចាប់ត្រីរួមគ្នា។

ក្រៅពីអ្នកភូមិបង្កោង ក៏មានអ្នកភូមិនៅតំបន់ផ្សេងៗទៀត រក្សាប្រពៃណីទំនៀមទម្លាប់ចាប់ត្រីរួមគ្នាផងដែរ ដែលនេះបង្ហាញពីសាមគ្គីភាព និងរក្សាប្រពៃណីនេះបន្តឱ្យកូនចៅជំនាន់ក្រោយបានស្គាល់៕